دەستەڕاستی پێشووی "ڕێویی کورد" دەستگیر کرا

ئاڤا نیوز

پۆلیسی تورکیا تاوانبارێکی داواکراوی نێودەوڵەتیی سویدی بە ناوی ئیسماعیل عەبدۆ، ناسراو بە "شلیکەکە"، دەستگیرکرد، ئەمەش بە پێشهاتێکی گرنگ دادەنرێت لە هەوڵەکان بۆ بەرەنگاربوونەوەی تاوانی ڕێکخراوی سنووربەزێن.

 

ڕاگەیێنراوی فەرمی: پۆلیسی سوید لە بەیاننامەیەکدا دەستگیرکردنەکەی پشتڕاستکردەوە و ڕایگەیاند، عەبدۆ "لە ئۆپەراسیۆنێکی پۆلیسدا لە تورکیا" دەستبەسەر کراوە و گومانی لێدەکرێت بۆ چەندین ساڵ لە سوید تێوەگلابێت لە تاوانی گەورەی ماددە هۆشبەرەکان و هاندانی تاوانی توندوتیژی.

لێدوانی فەرمی: ماتس بێرگرێن، جێگری سەرۆکی بەڕێوەبەرایەتیی ئۆپەراسیۆنە نیشتمانییەکانی سوید ڕایگەیاند، "دەستگیرکردنی ئیسماعیل دەرەنجامی هەوڵە بەئامانجەکانی سوید و تورکیایە. پۆلیسی سوید هاوکار بووە لەو لێکۆڵینەوەیەی کە بووە هۆی دەستگیرکردنی".

 

لەلایەکی دیکە: ئاژانسی ئەنادۆڵی تورکیا بڵاویکردەوە، وەک بەشێک لە ئۆپەراسیۆنێکی بەرفراوان لە تورکیا، لە چەندین شار ئۆپەراسیۆن ئەنجامدرا و بەپێی ڕاپۆرتە میدیاییەکان 19 گومانلێکراوی دیکەی تێدا دەستگیرکرا.

 

چیرۆکی سەرەکی: ئیسماعیل عەبدۆ، سەرۆکی باندە سویدییەکە، خاوەنی ڕەگەزنامەی تورکییە و پێشتر دەستە ڕاستی ڕەوا مەجید، سەرۆکی باندی "فۆکسترۆت" ناسراو بە "ڕێوی کورد" بوو. ئەو  دوو کەسە لە ساڵی 2023 ناکۆکی کەوتە نێوانیان، کە بووە هۆی ڕوودانی چەندین ڕووداوی تەقەکردن لە سوید و وایکرد دەستگیرکردنی ئیسماعیل عەبدۆ ببێتە یەکێک لە کارە لەپێشینەکانی پۆلیسی سوید.

 

ئەوەی پێویستە بیزانیت: مانگی سێی ئەمساڵ وەزارەتی دەرەوەی ئەمریكا لە ڕاگەیێنراوێكدا جگە لەوەی فۆكسترۆت-ی بە ڕێكخراوێكی تاوانكاریی نێودەوڵەتی ناساندووە، هاوكات سزای تووندی بەسەر سەركردەی دیاری ئەو ڕێكخراوە بە ناوی ڕەوا مەجید سەپاندووە كە بە ڕێوییە كوردەكە ناسراوە.

 

کاریگەری و لێکەوتەکان: ململانێی نێوان ڕێکخراوە تاوانکارییەکانی ئیسماعیل و ڕەوا سنوورەکانی سویدی تێپەڕاندووە و گەیشتووەتە تورکیا. لە ئەیلوولی 2023، وا بڵاوکرایەوە کە باندەکەی ڕەوا مەجید مەجید بەرپرسیار بوون لە کوشتنی دایکی ئیسماعیل عەبدۆ لە شاری ئوپسالا لە سوید. دواتر توندوتیژییەکان گواسترانەوە بۆ خاکی تورکیا، کاتێک ئەندامانی باندە ڕکابەرەکان لە ناوچەی سارییەر لە ئەستەنبووڵ دەستیانکرد بە هێرشی چەکداری لە دژی یەکدی.