ئەمریکا "ڕێوییە کوردەکە" و تۆڕەکەی سزا دەدات

ئاڤا نیوز

وەزارەتی دەرەوەی ئەمریکا سزا بە سەر ڕێکخراوێکی تاوانکاریی دەسەپێنێت كە سەركردەی ڕێكخراوەكە کوردە و لە سوێد بە "ڕێوییە كوردەكە" ناسراوە.

وێنە گەورەكە: ڕێكخراوێكی تاوانكاری بە ناوی (تۆڕی فۆکسترۆت Foxtrot Network) لەلایەن ئەمریكاوە بە ڕێكخراوێكی مافیایی تاوانكاریی نێودەوڵەتی وەسف كراوە، بنكە سەرەكییەكەی لە سوێدە و كاری بەقاچاخبردنی ماددەی هۆشبەر دەكات و لە قاچاخی چەكیش تێوەگڵاوە.

ڕاگەیێنراوی فەرمی: وەزارەتی دەرەوەی ئەمریكا لە ڕاگەیێنراوێكدا جگە لەوەی فۆكسترۆت-ی بە ڕێكخراوێكی تاوانكاریی نێودەوڵەتی ناساندووە، هاوكات سزای تووندی بەسەر سەركردەی دیاری ئەو ڕێكخراوە بە ناوی ڕەوا مەجید سەپاندووە كە بە ڕێوییە كوردەكە ناسراوە.

ئەوەی لەبارەیەوە دەوترێت: ڕێكخراوە سوێدیەكە بە ئەنجامدانی تاوانی تەقەکردن، گرێبەستی کوشتن و هێرشکردن بەشدار بووە لە زیادکردنی ڕێژەی تووندوتیژی لە وڵاتانی ئەسكەندەناڤیا و باکووری ئەوروپا. 


هۆكارە زانراوەكان: بەگوێرەی ڕاگەیێنراوەکەی ئەمریكا؛ ئێران ڕێکخراوەکەی بۆ هێرشکردنە سەر ئامانجەکانی ئیسرائیل و جووەکان لە ئەوروپا بەكارهێناوە، لەوانەش هێرشکردنە سەر باڵیۆزخانەی ئیسرائیل لە ستۆکهۆڵم لە کانوونی دووەمی 2024. هەر بەگوێرەی ڕاگەیێنراوەکە ڕەوا مەجید لەگەڵ وەزارەتی هەواڵگریی ئێران 'ئیتڵاعات' پەیوەندی و هاوکاری هەبووە کە ئەمریکا پێشتر چەندین جار ئەو وەزارەتەی سزا داوە.

لێكەوتەكان: وەزارەتی دەرەوەی ئەمریكا لەگەڵ وەزارەتی گەنجینەی ئەو وڵاتە پێکەوە بەردەوام دەبن لە سزادانی ئێران لەبەر "چالاکییە تێکدەرانەکانی"، ئەمەش وەک بەشێک لە هەڵمەتی ئەوپەڕی گوشاری ئیدارەی ئەمریکا بۆ سەر ئێران کە سەر لەو نوێ گەڕاوەتەوە.

باكگراوند: ڕێكخراوی تاوانكاریی فۆكسترۆت لەلایەن هێزە ئەمنییەکانی عێراق و پۆلیسی نێودەوڵەتییەوە (ئینتەرپوول) داوا کراوە. 'ڕەوا مەجید' سەرۆکی تۆڕەکە لە مانگی ئەیلوولی ساڵی ڕابردووەوە لە تورکیاوە بۆ ئێران ڕایکردووە، وەک لە میدیاکان بڵاوکراوەتەوە لەو کاتەی سەرقاڵی کارکردن بووە لە سنووری نێوان ڕۆژهەڵات و باشووری كوردستان دەستگیر کراوە.