تورکیا داخستنی سەر فڕۆکەخانەی سلێمانی درێژ کردەوە

ئاڤا نیوز

ئەمڕۆ دەسەڵاتی فڕۆکەوانیی تورکیا بۆ ماوەی سێ مانگی دیکە وادەی داخستنی ئاسمانی وڵاتەکەی بە ڕووی سلێمانی درێژ کردەوە.

 

وێنە گەورەکە: ماوەی دوو ساڵە گەشتە ئاسمانییەکانی فڕۆکەخانەی سلێمانی بە ئاراستەی تورکیا بەبیانووی پاراستنی ئاسایشی مەدەنی وڵاتەکە داخراون، تاوەکو ئێستا چەند جارێک وادەکە درێژ کراوەتەوە.

 

زانیاریی بەدەستهاتوو: بەگوێرەی ئەو خشتەیەی دەست ئاڤا کەوتووە، لەمڕۆوە تاوەکو شەوی 06-10-2025، کاتژمێر 11:59 خولەک قەدەغەیە هیچ فڕینێک لە فڕۆکەخانەی سلێمانییەوە بە ئاراستەی تورکیا بکرێت.

 

لێدوانی فەرمی: هەڤاڵ ئەبوبەکر، پارێزگاری شاری سلێمانی بە ئاڤا میدیای ڕاگەیاند: تا شتێکی فەرمیی نەبێت، ئێمە قسە لەسەر ئەو بابەتە ناکەین.

 

ئەوەی پێویستە بیزانیت: درێژکردنەوەی داخستنی ئاسمانی تورکیا بە ڕووی ئەو فڕۆکانەی لە فڕۆکەخانەی سلێمانی هەڵدەفڕن لەکاتێکدایە، چەند ڕۆژێک پێش ئێستا، کاروان یاروەیس، ئەندامی ئەنجوومەنی نوێنەران ڕایگەیاندبوو: لە سەردانەکەمان تورکیا داواکاریی خەڵکی سلێمانیمان گەیاندە ئەردۆغان، سەبارەت بە هەڵگرتنی سزاکانی سەر فرۆکەخانەی نێودەوڵەتیی سلێمانی، ئەردۆغان ڕایگەیاند، وەزیرە پەیوەندارەکان و تیمەکەی ڕادەسپێرێت بۆ پەیوەندی کردن لەگەڵ قوباد تاڵەبانی، جێگری سەرۆکی حکومەتی هەرێمی کوردستان و هەڵسەنگاندنی خۆیان بدەن بەمن.

 

باکگراوند: ڕۆژی 03-04-2023، کۆمپانیای تورکیش ئێرلاین نامەیەکی ئاگادارکردنەوەی بۆ فڕۆکەخانەی نێودەوڵەتیی سلێمانی نارد کە گەشتە ئاسمانییەکانیان بۆ ئەو فڕۆکەخانەیە تاکۆتایی مانگی چوار ڕادەگرن، لەدوای ئەو بەروارەوە هەرجارە و بە بیانوویەک ڕاگرتنی گەشتەکان درێژ کراوەتەوە و تا ئێستا گەشتە ئاسمانییەکانی نێوان تورکیا و سلێمانی دەستی پێنەکردۆتەوە.