لە هەڵەبجە ئامادەکاری بۆ دابەشکردنی زەوی خێراتر دەکرێت

ئاڤا نیوز

فەرمانبەر بۆ ستافی وردبینی و دابینکردنی زەوی لە سنووری بەڕێوەبەرایەتیی گشتیی شارەوانی هەڵەبجە زیاد کراوە، بەمەش هەنگاوەكانی دابەشکردنی زەوی بەسەر فەرمانبەران و خانەنشینان خێراتر دەبێت.

وێنە گەورەکە: ناوی 10 هەزار فەرمانبەر و خانەنشین لە سنووری پارێزگای هەڵەبجە بۆ وەرگرتنی زەوی گەڕاوەتەوە، بەڵام بە هۆی کەمی ستاف پڕۆسەی وردبینی و جێبەجێكردنی بڕیارەكە بە هێواشی بەڕێوەدەچوو، بەڵام ئێستا ستاف زیاد کراوە.

 

لێدوانی فەرمی: فەرحان عیزەت، گوتەبێژی شارەوانی هەڵەبجە لەم بارەوە گوتی: "دوای وردبینی، 700 ناو یەکلا کراونەتەوە کە زەوییان بۆ دابین بکرێت و بخرێنە نێو تیروپشکی وەرگرتنی زەوی، لە چەند مانگی ئایندەشدا قۆناغی دووەمی پڕۆسەکە دەست پێدەکەین و هەوڵ دەدەین پێش کۆتایی ئەمساڵ زەوی دابەش بکەین."

 

باکگراوند: بە بڕیاری سەرۆکوەزیران مەسرور بارزانی، دابەشکردنی زەوی بەسەر فەرمانبەران دەستی پێکرد و نزیکەی 485 هەزار فەرمانبەر لە سەرجەم ناوچەکانی هەرێمی کوردستان سوودمەند دەبن.