لە کەرکووک هەر کەسێک ئۆتۆمبێل لە نێو گەڕەکەکان بشوات سزای دارایی دەدرێت

ئاڤا نیوز

لیژنەی ڕێکخستنی شار لە قەزای ناوەندی کەرکووک، چەند بڕیارێکی نوێی سەبارەت بە فڕێدانی زبڵ و شوشتنی ئۆتۆمبێل دەرکرد، سزاکان لە 50 هەزارەوە دەست پێدەکەن تا یەک ملیۆن دینار دەچێت.

چیرۆکی سەرەکی: لە ماوەی ڕابردوو بە درێژایی زیاتر لە 12 ساڵە کەڵەکەبونی زبڵ و خاشاک گرفتی سەرەکی دانیشتووانی پارێزگای کەرکووک بووە، ئێستا حکومەتی خۆجێی کەرکووک هەنگاوێکی دیکەی ناوە و دەیەوێت لەو ڕێگەیەوە شارەکە پاک بکرێتەوە.

لێدوانی فەرمی: فەلاح یایچلی، قائیمقامی کەرکووک بە وەکالەت؛ بە ئاڤای گوت، "بڕیاردرا هەرکەسێک خۆڵ و خاشاکی بینا دروستکردن لەسەر شەقامی گشتیی یان جگە لە شوێنی کۆکردنەوەی زبڵ فڕێ بدات، بڕی یەک ملیۆن دینار سزای دارایی دەدرێت، ئەوانەشی لە جای ئۆتۆمبێلەوە شت فڕێدەدەن 250 هەزار سزاکەیان دەبێت."

 

زانیاریی زیاتر: بەگوتەی قائیمقامی کەرکووک بە وەکالەت، هەر کەسێک لە کۆڵان و شوێنە گشتییەکان ئۆتۆمبێل بشوات 50 هەزار دینار سزا دەدرێت، ئەوانەشی دەبنە هۆی بەفیڕۆدانی ئاو یان بە سۆندە شۆستە و شەقامەکان بشوات 50 هەزار دینار سزای دارایی دەژمێرێت.

 

ئەمەش بزانە: ڕۆژانە شارەوانی کەرکووک زیاتر لە هەزار و 200 تۆن زبڵ و خاشاک کۆدەکاتەوە، بۆ ئەو مەبەستە گرێبەست لە گەڵ دوو کۆمپانیای پەیوەیست کراوە.