كارتی نیشتیمانی بۆ سزادراوانی ‌ناو چاكسازییەكـانی هەرێمی کوردستان دەردەهێنرێت

ئاڤا نیوز

بڕیارە هەفتەی داهاتوو کارتی نیشتیمانی بۆ ئەو سزادراونەی ناو چاكسازییەكانی هەرێمی كوردستان دەربهێنرێت كە تا ئێستا خاوەنی ناسنامەی باری شارستانی یاخود كارتی نیشتیمانی نین.

وێنە گەورەکە: زیاتر لە دوو هەزار لەو سزادراوانەی لە چاکسازییەکانی هەرێمی کوردستانن تاوەکو ئێستا کارتی نیشتیمانییان نیە، بۆیە بەڕێوەبەرایەتیی گشتی چاکسازی کۆمەڵایەتیی بە هاوکاری بەڕێوەبەرایەتیی گشتی ڕەگەزنامەی هەرێمی کوردستان سەرقاڵی دۆزینەوەی شێوازێکن بۆ دەرهێنانی کارتی نیشتیمانی بۆ سزادراوان لە چاکسازییەکانی هەرێمی کوردستان.

لێدوانی فەرمی: ئیحسان عبدولڕه‌حمان، بەڕێوەبەری گشتی چاكسازی كۆمەڵایەتیی هەرێمی کوردستان بە ئاڤا میدیای ڕاگەیاند، سەردانی بەڕێوەبەری گشتی ڕەگەزنامەی هەرێمی كوردستانمان كرد بۆ دۆزینەوەی میكانیزمەكانی چۆنیەتی دەرهێنانی كارتی نیشتیمانی بۆ سزادراوان، لیژنەیەکی تایبەتی کارمەندانی کارتی نیشتمانی دێنە چاکسازییەکان بۆ جێبەجێکردنی پرۆسەکە ڕەزامەندی حکومەتی فیدراڵیمان وەرگرتووە.

ئیحسان عبدولڕه‌حمان، دەڵێت، ژمارەی ئەو سزادراوانەی کە کارتی نیشتیمانییان نیە دوو هەزار و 335 کەس دەبێت، بەڕێوەبەرایەتییەكانی ڕەگەزنامـە و باری شارستانی هـەر سێ پارێزگای هــەولێر، سلێمانی و دهـۆك ڕاده‌سپێردرێن بۆ ئەو سزادراوانەی كە لەناو چاكسازییەكانی هەرێمی كوردستان سزادراون و تا ئێستا خاوەنی ناسنامەی باری شارستانی یاخــود كــارتی نیشتیمانی نین و بۆیان ده‌ربهێنن.

ئەوەی پێویستە بیزانیت: پرۆسەکە لەناو چاکسازییەکان بەڕێوەدەچێت و بڕیارە هەفتەی داهاتوو دەستپێبکات، ئەوەی ناسنامەی باری شارستانیشی نەبێت لەسەر ڕەگەزنامەی عێراقی کارتی نیشتیمانی بۆ دەردەهێنرێت.