قوتابیان دڵنیا دەکرێنەوە؛ سەرجەم دەرچووانی پۆلی 12 لە زانکۆ و پەیمانگەکان وەردەگیرێن

ئاڤا نیوز

 

وەزارەتی خوێندنی باڵا و توێژینەوەی زانستی ئامادەکارییەکانی تەواوکردوون و پلانیان هەیە هاوشێوەی چەند ساڵی ڕابردوو سەرجەم دەرچووانی پۆلی 12 ئامادەیی بۆ ساڵی خوێندنی 2024-2025 لە زانکۆ و پەیمانگە حکومییەکان وەرگربن.

 

وێنە گەورەکە: دوای تەواوبوونی تاقیکردنەوەی خولی دووەمی پۆلی 12ـی ئامادەیی، وەزارەتی پەروەردە داتای دەرچووان دەداتە وەزارەتی خوێندنی باڵا و توێژینەوەی زانستی و فۆرمی زانکۆلاین بۆ قوتابیان کارا دەکرێت. ساڵی ڕابردوو سەرووی 55 هەزار قوتابی لە زانکۆ و پەیمانگەکانی هەرێمی کوردستان وەرگیران و پلان هەیە ئەمساڵیش سەرجەمیان وەربگیرێن.

 

لێدوانی فەرمی: د. ئامانج عەبدوڵڵا، ڕاوێژکار لە وەزارەتی خوێندنی باڵا و توێژینەوەی زانستی بە ئاڤای گوت، "توانای وەرگرتنی سەرجەم دەرچووانمان هەیە، ساڵی ڕابردووش 20 هەزار کورسی زیاترمان هەبووە لەو ژمارەیەی وەرگیراون."

 

ئەوەی پێویستە بیزانیت: ئەمساڵ  117هەزار قوتابی پۆلی 12ی ئامادەیی بەشداریان لە تاقیکردنەوەکانی کۆتایی کرد، وەزارەتی پەروەردە ئەنجامەکانی خولی یەکەمی بڵاو کردەوە، بەبێ ئەوەی ڕێژەی دەرچووان ئاشکرا بکات.