زانیاری لەبارەی ئەشكەوتی جاسەنە؛ ئەو شوێنەی بووە هێمای چەكدادانی پەكەكە

ئاڤا نیوز

ئەشکەوتی جاسەنە، پەناگەی شێخ مەحموودی حەفید بووە لە شەڕی دژ بە ئینگلیزەكان، لە سەردەمی شۆڕشی نوێشدا، پەناگەیەكی گرنگ و ستراتیژیی هێزەكانی پێشمەرگە بووە بۆ پێشمەرگەكانی سەنگەری سووردارش و دووكان و زنجیرە چیای پیرەمەگرون، بووە شوێنی چەکدانانی پەکەکەش.

ئەوەی پێویستە بیزانیت: ئەشکەوتی جاسەنە بە دووری 50 کیلۆمەتر دەکەوێتە ڕۆژئاوای شاری سلێمانی و ناوچەی سوورداش لە دامێنی بەرزاییەكانی نەبی ئاغا لە زنجیرەچیای سارا، لەسەر ڕێگای سلێمانی - دوکان، لە پشتی گوندی کانی خان، ئەشکەوتەكە درێژییەکەی 40 مەتر و پاناییەکەی 9 مەترە، بەرزییەكەشی 7 مەترە، لە ژوورەوە لە دوو بەش پێكهاتووە، كە بەشی دواوەی قەبارەكەی بچووكترە لەوەی پێشەوە.

زانیاریی زیاتر: دوای هێرشی فڕۆکەکانی سوپای ئینگلیز لە ساڵی 1923، شێخ مەحموودی حەفید ئەشکەوتی جاسەنەی کردووەتە پەناگە و چاپخانەی تێدا دامەزراند، یەکەم ڕۆژنامە بەناوی 'بانگی حەق' لە 2ـی ئازاری 1923 لەو ئەشکەوتە بڵاوکردەوە، كە بە یەکەم ڕۆژنامەی سەردەمی شاخ و زمانحاڵی شۆڕشی کورد دادەنرێت، کە 'ئەحمەد خواجە' سەرنووسەری بووە و سێ ژمارەی لێ دەرچوو.

ئەشکەوتی جاسەنە لە شۆڕشی نوێدا بۆ پێشمەرگە گرنگ بوو؛ لە دژی ڕژێمی بەعس پەناگەیەکی گرنگی هێزەکانی پێشمەرگە بووە لە ناوچەی سوورداش و دووکان و زنجیرە چیای پیرەمەگروون.

بابەتە ستراتیژییەکە: لە 11ـی تەمموزی 2025، وەک یەکەم هەنگاوی پڕۆسەی ئاشتی لە تورکیا، 30 چەکداری پەکەکە کە چواریان فەرماندە بوون، لە جاسەنە چەکەکانیان دانا.

بەتەنیشت ئەم بابەتەوە: بەهۆی سەرنجڕاكێشی شوێنەكە و هەڵكەوتەی جوگرافی، ئەشکەوتەکە بووەتە جێی سەرنجی گەشتیاران و هەندێک لەو گەشتیارانەی بە مەبەستی شاخەوانی سەردانی ناوچەکە دەکەن، شەوان لەو ئەشکەوتەدا ڕۆژ دەکەنەوە.