قۆناغی دووەمی دابەشکردنی زەوی لە هەولێر دەستپێدەکات

ئاڤا نیوز

تیمەکانی وردبینی شارەوانی هەولێر سەرقاڵی جیاکردنەوەی فۆرمەکانی زەوی و تەواوکردنی نەخشە کەرتییەکانن، بە گوتەی بەڕێوەبەری شارەوانی هەولێر هەوڵدەدەن لەم هەفتەیە قۆناغی دووەمی دابەشکردنی جێبەجێ بکەن.

وێنە گەورەکە: شارەوانییەکان سەرجەم فۆرمە پەسەندکراوەکانیان بۆ گەڕاوەتەوە، سنووری پارێزگای هەولێر نزیکەی 140 هەزار فەرمانبەر و خانەنشین لە وەرگرتنی زەوی سوودمەند دەبن، 70 هەزاریان هی شارەوانییەکانی دەورووبەرن.

لێدوانی فەرمی: کارزان عەبدولهادی، بەڕێوەبەری شارەوانی هەولێر بە ئاڤای گوت، "تیمەکان ڕۆژانی پشووش دەوام دەکەن بۆ ئەوەی بە زووترین کات بتوانین پرۆسەکە دەستپێبکەینەوە، هەوڵدەدەین لەم هەفتەیە تیروپشک بۆ بەشێکی دیکە بکەین، کە نزیکەی 20 هەزار کەس دەگرێتەوە."

لەلایەکی دیکەوە: بڕیارە هەر لەم هەفتەیە بەڕێوەبەرایەتیی گشتیی شارەوانییەکانی هەولێر کە 37 سەرۆکایەتی شارەوانی قەزا و ناحیەکانی سنووری پارێزگای هەولێر لە خۆدەگرێت، تیروپشک بۆ 34 هەزار پارچە زەوی بکرێت.