بازگەكانی هەولێر بەڕووی بەرهەمی جووتیارانی مەخموور و دیبەگە دەكرێنەوە

چی ڕوویدا: ئەمڕۆ یەكشەممە، لە دیوانی پارێزگای هەولێر، ئومێد خۆشناو، پارێزگاری هەولێر سەرپەرشتی كۆبوونەوەیەكی فراوانی كرد لەسەر كێشەی گەنم و بەرهەمی كشتوكاڵیی سنووری مەخموور، هەریەكە لە جێگری پارێزگاری نەینەوا و سەرۆكی لیژنەی باڵای بەبازاڕكردنی گەنمی جووتیاران، بەڕێوەبەری كشتوكاڵی هەولێر، قایمقامی مەخموور، بەڕێوەبەری ناحیەكانی دیبەگە و گوێڕ و تەنانەت بەڕێوەبەری سایلۆ و بازگەكانیش ئامادەبوون.

لێدوانی فەرمی: ئومێد خۆشناو بە ئاڤای ڕاگەیاند، ئەمساڵ پرۆسه‌ی وه‌رگرتن و به‌بازاڕكردنی گه‌نمی جووتیاران به‌شێوه‌یه‌كی ڕێكوپێك به‌رێوه‌چووه‌ و جووتیاران لێی ڕازین.

پارێزگاری هەولێر ئاماژەی بەوەشكرد، لەپێناو خزمه‌تی جووتیارانی سنووری دیبەگە و مەخموور، له‌ 16ـی ئه‌م مانگه‌وه‌ بازگه‌كان بەڕووی ساغكردنەوەی بەرهەمی گەنمی جووتیاران دەكرێنەوە.

سەبارەت بە به‌رهه‌مه‌ كشتوكاڵییه‌كانی دیكه‌، ئاسانكاری بۆ جووتیاران ده‌كرێت لەپێناو بەبازاڕكردنی بەرهەمەكانیان، بەو مەرجەی ڕێپێدانی دامودەزگا كشتوكاڵییەكان لەگەڵ خۆیان بهێنن.

لەلایەكی دیكەوە: نەوزاد شێخ كامیل، بەڕێوەبەری گشتیی بازرگانیی هەرێمی كوردستان، بەردەوامە لە بەسەركردنەوەی سایلۆكان، بە مەبەستی بەدواداچوونی مەیدانی بۆ چۆنیەتی بەڕێوەچوونی پرۆسەی وەرگرتنی گەنمی جووتیاران، لەو چوارچێوەیەشدا سەردانی بنكەی وەرگرتنی گەنمی لە هەڵەبجە و سەیدسادق كرد. هاوكات سەردانی كۆگاكانی خۆراكی سلێمانی كرد و ڕێنمایی پێویستی پێ دان كە نەهێڵن بەهۆی بەرزبوونەوەی پلەكانی گەرما، خۆراكی كۆگاكراو زیانی پێ بگات.