چوارچێوەی هەماهەنگی پرسی هەناردەکردنەوەی نەوتی هەرێمی کوردستان تاوتوێ دەکات

ئاڤا نیوز

بڕیارە لە کۆبوونەوەی سبەی هێزەکانی چوارچێوەی هەماهەنگی چەندین دۆسیەی گرنگی ناوخۆیی و هەرێمی تاوتوێ بکرێت، دیارترینیان دۆسیەی هەناردەکردنەوەی نەوتی هەرێمی کوردستان دەبێت.

وێنە گەورەكە: پرسی دەستپێكردنەوەی هەناردەكردنی نەوتی هەرێمی كوردستان لەڕێگەی بۆری بەرەو بەندەری جەیهان لە توركیا كە زیاتر لە 28 مانگە وەستێنراوە، بووەتە گرێ كوێرەی نەگەیشتن بە ڕێككەوتن لەنێوان هەولێر و بەغدا بە تایبەت لە كێشەی ڕاگرتنی مووچەی هەرێمی كوردستان، هەر ئەمەش وایكردووە كۆبوونەوەكان و دانووستانەكان بێ ئەنجام بن.

زانیاریی بەدەستهاتوو: بەگوێرەی سەرچاوەیەک لە چوارچێوەی هەماهەنگی کە قسەی بۆ میدیای عێراق کردووە، ڕاگەیاندووە کە جگە لە بابەتی هەناردەکردنەوەی نەوتی هەرێمی کوردستان، لە کۆبوونەوەکە چەند تەوەرێکی دیکەی هەستیاریش تاوتوێ دەکرێن، لەوانە پرسی بوونی سەربازیی تورکیا لەسەر خاکی عێراق، بەتایبەت دوای ڕێککەوتنی چەکدانانی پارتی کرێکارانی کوردستان (پەکەکە).

لە هەمان کاتدا: سەرکردەکانی چوارچێوەکە گفتوگۆ لەسەر ئاماژەکانی جووڵەی ئیسرائیل بەرامبەر ئێران و گەڕانەوەی گرژییەکان بۆ ناوچەکە دەکەن. تەوەرێکی دیکەی گرنگی کۆبوونەوەکەش، پرسی بەردانەوەی ئاوە لەلایەن تورکیاوە و دابینکردنی پشکی ئاوی عێراق دەبێت.

ئەوەی پێویستە بیزانیت: لە نوێترین لێدوانیدا، وەزیری نەوتی عێراق هۆکارەکانی دواکەوتنی دەستپێکردنەوەی هەناردەکردنی نەوتی لەڕێگەی بەندەری جەیهانی تورکیاوە ئاشکرا دەکات. هاوکات ئاماژە بەوە دەدات نزیکەی لەسەر هەموو بڕگەکان ڕێککەوتن کراوە، جگە لە بابەتی بڕی بەکاربردنی ناوخۆیی و پاڵاوتنی نەوت.