دێربی بادینان لە سلێمانی دەکرێت

ئاڤا نیوز

لەبارەی بەڕێوەچوونی یاریی کۆتایی جامی عێراق بڕیاردرا و کۆتایی ئەم هەفتەیە لەسەر یاریگەی نەورۆز یارییەکە بکرێت، تانەکەی زاخۆ سەبارەت بە گۆڕینی یاریگەکە قبووڵنەکرا.

وێنە گەورەکە: دهۆک و زاخۆ، بۆیەکەمین جار لەمێژوو وەک دوو یانەی کوردی سەرکەوتن بۆ یاریی کۆتایی جامی عێراق، بەهۆی ڕووداوەکانی یاریی یانەکەی بەرامبەر نەورۆز لە یەکێک لە یارییەکانی خولی ئەستێرەکانی عێراق، یانەی زاخۆ بە فەرمی داوای لە فیدراسیۆنی تۆپی پێی عێراق کرد یاریگەکە بگۆڕدرێت بۆ یاریگەی شەعب، بەڵام ڕەتکرایەوە.

لێدوانی فەرمی: دڵزار عەزیز، گوتەبێژی یانەی زاخۆ بە ئاڤای گوت، "دەست بە ئامادەکاری بۆ یارییەکە دەکەین و ئامادەین بۆ بردنەوەی یەکەم نازناوی جامی عێراق."

ئەوەی پێویستە بیزانیت: یارییەکە ڕۆژی هەینی کاتژمێر 08:00ـی شەو لەسەر یاریگەی نەورۆز بەڕێوەدەچێت، چاوەڕێ دەکرێت هەزاران هاندەر لە زاخۆ و دهۆک ئەو شەوە ڕووبکەنە سلێمانی.