تورکیا لە دژی هێرشەکانی ئیسرائیل بۆ سەر سووریا پەیامێکی تووند بڵاودەکاتەوە

ئاڤا نیوز

وەزارەتی دەرەوەی تورکیا بە تووندی سەرکۆنەی هێرشەکانی ئیسرائیل بۆ سەر سووریا دەکات، پشتیوانی وڵاتەکەی بۆ سووریا دووپات دەکاتەوە.

وێنە گەورەکە: شەڕ و گرژییەکانی نێوان دروز و حکومەتی سووریا بووە هۆی ئەوەی ئیسرائیل بۆ ناو شەڕەکە پەلکێش بکات، بەهۆی ئەوەی تورکیا و ئیسرائیل دوو بەرەی دژ بە یەکن و تورکیا پشتیوانی لە حکومەتی نوێی سووریا دەکات، ڕووداوەکە کاردانەوەی تووندی ئەو وڵاتەی لێکەوتەوە.

ڕاگەیێنراوی فەرمی: وەزارەتی دەرەوەی تورکیا ڕایگەیاندووە: هێرشەکانی ئیسرائیل بۆ سەر سووریا "کارێکی تێکدەرانەیە" ئامانجی تێکدانی سەقامگیری و ئاسایشی تەواوی ناوچەکەیە، ئێمە پشتیوانی خۆمان بۆ حکومەتی سووریا دووپات دەکەینەوە.

لەلایەکی دیکەوە: جەودەت یڵماز، جێگری سەرۆککۆماری تورکیا ڕایگەیاند: هێرشەکانی ئیسرائیل بۆ سەر سووریا تەنیا سەروەری سووریا ناکاتە ئامانج، بەڵکو بەئاشکرا هەڕەشەیە بۆ سەر سەقامگیری هەموو ناوچەکە".

لە پاڵ ئەوەشدا: فەرمانگەی پەیوەندییەکانی سەر بە سەرۆکایەتی کۆماری تورکیا ڕایگەیاند: هێرشەکانی ئیسرائیل بۆ سەر سووریا نەک تەنیا سەقامگیریی و ئاسایشی سووریا، بەڵکو ئارامی تەواوی ناوچەکەمان دەکاتە ئامانج، سەرکۆنەی هێرشەکە دەکەین.