ئیسرائیل زنجیرەیەک هێرشی ئاسمانی کردە سەر شاری دەرعا

ئاڤا نیوز

دوای بە ئامانجگرتنی بارەگای دەستەی ئەرکانی گشتی سووپای سووریا لە دیمەشقی پایتەختی سووریا، هێزی ئاسمانیی سوپای ئیسرائیل پێگەیەک و کاروانێکی سوپای سووریای لە شاری دەرعا کردە ئامانج.

زانیاریی بەدەستهاتوو: بەگوێرەی ڕوانگەی سووری بۆ مافەکانی مرۆڤ، سوپای ئیسرائیل زنجیرەیەک هێرشی ئاسمانیی کردە سەر شاری دەرعا، لەو هێرشانەدا پێگەیەکی سوپای سووریا کرایە ئامانج."

زانیاریی زیاتر: ڕوانگەی سووری دەڵێت، "بۆردوومانەکە لە نزیک کۆشکی پارێزگار ڕوویداوە، هەروەها کاروانێکی سوپاشی کردووەتە ئامانج کە لە دەرعاوە بەرەو سوەیدا دەچوو، لەگەڵ بارەگای لیوای 132 لە پارێزگاکەدا."

لەلایەکی دیکەوە: هەر ئەمڕۆ سوپای ئیسرائیل بە فەرمی ڕایگەیاند، کە هێرشی کردووەتە سەر دیمەشق  و کۆشکی سەرۆکایەتی و وەزارەتی بەرگریی سووریایان کردووەتە ئامانج.

ڕاگەیێنراوی فەرمی: وەزارەتی تەندروستیی سووریا ڕایگەیاند، "بەهۆی هێرشی سوپای ئیسرائیل بۆ سەر بارەگای دەستەی ئەرکانی گشتی سووپای سووریا کەسێک کوژراوەو 18ـی دیکەش بریندارن".

دەزگاکانی ڕاگەیاندنی ئیسرائیلیش ئاماژەیان بەوە کردووە "ئامانجی هێرشەکان لە دیمەشق، کۆشکی سەرۆکایەتی و باڵەخانەی سەرۆکایەتیی ئەرکانی سووریا بووە."