وەزیری بەرگریی ئیسرائیل: دەبێت باشووری سووریا لە چەک دابماڵرێت

ئاڤا نیوز

وەزیری بەرگریی ئیسرائیل ئامانجی وڵاتەکەی لە هێرشە ئاسمانییەکان ئاشکرا دەکات و ڕایدەگەیەنێت دەبێت باشووری سووریا لە چەک دابماڵرێت.

وێنە گەورەکە: ماوەی چوار ڕۆژە پێکدادانی چەکداری لە پارێزگای سوەیدای دروزنشین ڕوودەدات، ئیسرائیل لە بەرامبەردا بە چڕی هێرشە ئاسمانیەکانی بۆ سەر سووریا دەستپێکردووە و پابەندی خۆی بە پاراستنی دروزەکان دووپات دەکاتەوە.

لێدوانی فەرمی: یسرائیل کاتز، وەزیری بەرگریی ئیسرائیل ئەمڕۆ چوارشەممە بە میدیاکانی ڕاگەیاند، دەبێت باشووری سووریا لە چەک دابماڵرێت و پابەندین بە پاراستنی دروزەکانەوە، ڕێگە بە دروستبوونی هیچ هەڕەشەیەک نادەین لە سەر ئاسایشی نیشتیمانی و سنورەکانی ئیسرائیل، گەر پێویست بکات لە هەموو سووریا ئامانجەکانمان دەپێکین لە پێناو پاراستنی دروزەکان.

زانیاریی زیاتر: سوپای ئیسرائیل ئەمڕۆ چوارشەممە هێرشی کردە سەر باڵەخانەی وەزارەتی بەرگری سووریا، لە هەمان کاتدا بە پێی هەواڵێکی میدیا ئیسرائیلیەکان هێرشێکی ئاسمانی لە لایەن فڕۆکە جەنگیەکانی ئیسرائیلەوە بۆ سەر باڵەخانەی سەرۆکایەتی سووریا ئەنجامدراوە.