ترەمپ: ئێران ناتوانێت بگەڕێتەوە سەر بەرنامەی ئەتۆمی

ئاڤا نیوز

سەرۆکی ئەمریکا بۆ جارێکی دیکە باس لە هێرشی ئەمریکا بۆ سەر پێگە ئەتۆمییەکانی ئێران دەکات و بە ناوازەترین هێرشی سەربازی ناوی دەبات، دەشڵێت، ئێران ناتوانێت جارێکی دیکە بگەڕێتەوە سەر بەرنامە ئەتۆمییەکەی.

وێنە گەورەکە: لە " جەنگی 12 ڕۆژە "ـی نێوان ئیسرائیل و ئێران، هێزی ئاسمانی ئەمریکا لە هێرشێكدا بۆ سەر ئێران بەشداربوو، دۆناڵد ترەمپ، سەرۆکی ئەمریکا بە شێوەیەکی فەرمی و ڕاستەوخۆ هێرشی ئەمریکای بۆ سەر وێستگە ئەتۆمییەکانی ئێران فۆردۆ، نەتەنز و ئەسفەهان ڕاگەیاند و بە کۆتایی بەرنامەی ئەتۆمی ئێران ناوی برد.

لێدوانی فەرمی: دۆناڵد ترەمپ، سەرۆکی ئەمریکا لە کۆنگرەیەکی رۆژنامەوانیدا لە کاتی پێشوازی لە شازدە سەلمان بن حەمەد، سەرۆکوەزیرانی بەحرەین ڕایگەیاند، گفتوگۆ لەسەر ئاسایشی ڕۆژهەڵاتی ناوەڕاست و هێرشی ئەمریکا بۆ سەر پێگە ئەتۆمییەکانی ئێران دەکەین، هەمووان دەزانن ناوازەترین هێرشی سەربازی بوو لە مێژوودا، ئێمە هەموو توانای ئەتۆمی ئێرانمان لە ناوبرد و جارێکی دیکە ناتوانن بگەڕێنەوە سەر بەرنامەی ئەتۆمی.

ئەوەی پێویستە بیزانیت: لە دوای ڕاگەیاندنی ئاگربەست و ڕاگرتنی جەنگی نێوان ئێران و ئیسرائیل، دۆناڵد ترەمپ داوای لە تاران کرد بگەڕێنەوە بۆ سەر مێزی گفتوگۆ و دانوستاندن، بەڵام دوای چەندین جار ڕاگەیاندنی کاتی کۆبوونەوە لەگەڵ ئێران لە لایەن خودی ترەمپ و بەرپرسانی ئەمریکیەوە تاوەکو ئێستا کۆبوونەوەکە ئەنجام نەدراوە و بەرپرسانی تاران وەک مەرجی پێشوەختە بۆ دەستپێکردنەوەی دانوستاندنەکان داوای گەرەنتی هێرش نەکردنەوە سەر وڵاتەکەیان دەکەن.