وەزارەتی دەرەوەی عێراق بۆردوومانەکانی ئیسرائیل بۆ سەر دیمەشق ئیدانە دەکات

ئاڤا نیوز

وەزارەتی دەرەوەی عێراق ئیدانەی بۆردوومانەکانی ئیسرائیل بۆ سەر دیمەشقی پایتەختی سوریا کرد و بە پێشێلکاریی یاسای نێودەوڵەتیی ناوی دەبات.

وێنە گەورەکە: دوای چوار ڕۆژ لە شەڕ و پێکدادانانی نێوان هێزەکانی سووریا و دروزەکان، ئیسرائیل هێرشێکی بەرفراوانی ئاسمانیی بۆ سەر سووریا دەستپێکردووە و وەک خۆی دەڵێت، بۆ پاراستنی دروزەکانە، هێرشەکان کۆشکی سەرۆکایەتی و وەزارەتی بەرگرییان لە دیمەشق کردووەتە ئامانج و زیانی گەورەیان لێکەوتووەتەوە.

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوێکدا ڕایگەیاند: عێراق بە تووندی ئیدانەی بۆردوومانەکانی ئیسرائیل بۆ سەر دیمەشقی پایتەختی سووریا دەکات و قووڵکردنەوەی ئازارە مرۆییەکانیان و خستنە مەترسیی ژیانی هاووڵاتیانی مەدەنیی سووریا ڕەتدەکاتەوە .

زانیاریی زیاتر: وەزارەتی دەرەوەی عێراق داوای ڕاگرتنی گرژی و ئاڵۆزییەکان لە سووریا کردەوە، چونکە هەڕەشەیەکی ڕاستەوخۆ بۆ سەر ئاسایش و سەقامگیریی ناوچەکە دروست دەکات.

ئەمەش بزانە: وەزارەتەکە جەخت لە گرنگیی پاراستنی مافی سەرجەم پێکهاتەکانی گەلانی سووریا و سەلامەتییان دەکاتەوە، داوای دەستپێکردنی گفتوگۆیەکی نیشتمانیی ڕاستەقینە لە نێوان ئیدارەی سووریا لە دیمەشق و نوێنەرانی پێکهاتە جیاوازەکان دەکاتەوە.