ئەمریکا هەوڵی کەمکردنەوەی گرژییەکانی سووریا دەدات

ئاڤا نیوز

ئەمریکا گرژییەکانی سووریا و هێرشەکانی ئیسرائیل بۆ سەر ئەو وڵاتە بە "لێکتێنەگەیشتن" ناو دەبات و هەوڵی کەمکردنەوەی ئەو گرژییانە دەدات.

وێنە گەورەکە: ماوەی چوار ڕۆژە گرژی و ئاڵۆزی لەنێوان هێزە ئەمنییەکانی سووریا و دروزەکان لە شاری سوەیدا بەردەوامە، بەمەبەستی پاراستنی درۆزەکانیش، ئیسرائیل هێرشی ئاسمانی بۆ سەر سووریا دەستپێکرد.

لێدوانی فەرمی: تامی، برووس، وتەبێژی وەزارەتی دەرەوەی ئەمریکا، ڕایگەیاند دۆناڵد ترەمپ، سەرۆکی ئەمریکا و مارکۆ ڕۆبیۆ، وەزیری دەرەوەی ئەو وڵاتە، لە هەوڵی ئەوەدان گرژییەکانی سووریا کەم بکەنەوە. ئەو گوتیشی پرسەکە ئاڵۆزە و هەوڵ دەدرێت بە کشانەوەی سوپای سووریا لە سوەیدا ڕێگا بۆ هێوربوونەوەی دۆخەکە خۆش بکرێت.

زانیاریی زیاتر: بەهۆی پێکدادانەکانی سوپای سووریا و دروزەکان زیاتر لە 300 کەس کوژراون و ئیسرائیلیش بە پاساوی بەرگریکردن لە دروزەکان زیاتر لە 160 ئامانجی لە سووریا بۆردومان کردووە.