ئەحمەد شەرع: دروزەکان بەشێکی ڕەسەنی نیشتمانن و ڕێگە بە دابەشبوونی سووریا نادەین

ئاڤا نیوز

سەرۆککۆماری سووریا، جەختی کردەوە، درووزەکان "بەشێکی ڕەسەنی نیشتمانن" و ڕایگەیاند، بەرپرسیارێتیی پاراستنی ئاسایشی پارێزگای سوەیدا سپێردراوە بە گرووپە ناوخۆییەکان و شێخەکانی دروز. ئەم بڕیارە، بە وتەی شەرع، بۆ ڕێگریکردنە لە بەدوورگرتنی وڵات بۆ ناو شەڕێکی نوێ و لەسەر بنەمای "بەرژەوەندیی باڵای نیشتمانی".

چیرۆکی سەرەکی: لە ماوەی چەند ڕۆژی ڕابردوودا، بەهۆی تووندوتیژییەکانی سوەیداوە زیاتر لە 350 کەس کوژراون، لەنێویاندا 79 چەکداری دروز، 55 هاووڵاتی سڤیل، 189 ئەندامی هێزەکانی حکومەت، 18 چەکداری هۆزەکان و 15 ئەندامی هێزەکانی حکومەت بەهۆی هێرشە ئاسمانییەکانی ئیسرائیلەوە.

پەیامی فەرمی: ئەحمەد شەرع، سەرۆککۆماری سووریا، لە وتارێکدا کە ئاژانسی "سانا"ـی فەرمی بڵاوی کردەوە، ڕایگەیاند: "پاراستنی ماف و ئازادییەکانی دروزەکان لە ئەولەوییەتی دەوڵەتدایە،" وتیشی: "هەر هەوڵێک بۆ ڕاکێشانیان بەرەو لایەنی دەرەکی یان دروستکردنی دووبەرەکیی ناوخۆیی ڕەتدەکەینەوە."

زانیاریی زیاتر: سەبارەت بە ڕووداوەکانی پارێزگای سوەیدا، سەرۆککۆماری سووریا ڕوونیکردەوە کە دەوڵەت بە هەموو دامەزراوەکانییەوە دەستوەردانی کردووە بۆ ڕاگرتنی شەڕی نێوان گرووپە چەکدارەکان و چەند "چەتەیەکی لە یاسا دەرچوو"ـی بەوە تۆمەتبار کرد کە دیالۆگیان ڕەتکردووەتەوە و بوونەتە هۆی نانەوەی ئاژاوە.

شەرع ئاماژەی بەوەشدا کە دەستوەردانی ئیسرائیل "ئامانجی تێکدانی هەوڵەکانی دەوڵەت بووە بۆ گێڕانەوەی سەقامگیری،" و جەختیشی کردەوە کە "ناوبژیوانیی ئەمریکی، عەرەبی و تورکی ڕۆڵیان هەبووە لە ڕێگریکردن لە تەشەنەسەندنێکی بەرفراوان."

هەروەها دووپاتیکردەوە کە "ئیسرائیل هەوڵدەدات ڕووداوەکان بقۆزێتەوە بۆ بڵاوکردنەوەی ئاژاوە و هەڵوەشاندنەوەی یەکڕیزیی گەلی سووریا،" بەڵام سوورییەکان "بەدرێژایی مێژوو هەموو هەوڵێکی جیابوونەوە و دابەشبوونیان ڕەتکردووەتەوە."

لە کۆتاییدا شەرع وتی: "ئەوانەی دەستدرێژییان کردووەتە سەر خوشک و برا دروزەکانمان، بەپێی یاسا لێپێچینەوەیان لەگەڵ دەکرێت."