ئەمریکا: کۆچبەرە ناساییەکان لە وڵاتەکەمان دەستگیر دەکەین

ئاڤا نیوز

بەڕێوەبەری بە وەکالەتی کۆچ و گومرگی ئەمریکا، لە چاوپێکەوتنێکدا لەگەڵ کەناڵی سی بی ئێس نیوزی ئەمریکی ڕایگەیاند، بریکارەکانیان هەرکەسێک بە نایاسایی لە وڵاتەکەدا ببینن، دەستگیری دەکەن، تەنانەت ئەگەر هیچ تۆمارێکی تاوانکاریشیان نەبێت.

لێدوانی فەرمی: تۆد ڵاینس، بەڕێوەبەری بە وەکالەتی کۆچ و گومرگی ئەمریکا، جەختی لەوە کردەوە کە دامەزراوەکەیان کاردەکات بۆ دەستگیرکردن و دیپۆرتکردنەوەی ئەو کەسانەی کە بە نایاسایی لە ئەمریکان و مێژوویەکی تاوانکاریی مەترسیداریشیان هەیە.

ئاماژەی بەوەشدا کە ئەفسەرانیان هەر کۆچبەرێکی نایاسایی کە ڕووبەڕوویان دەبێتەوە، دەستگیر دەکەن، ئەمەش گۆڕانکارییەکی گەورەیە لە سیاسەتی پێشووی ئیدارەی بایدن کە تەنیا سەرنجی لەسەر مەترسییە ئەمنییەکان و تاوانبارە قورسەکان بوو.

هەروەها، ڵاینس ڕایگەیاند کە فشارێکی زیاتر دەخەنە سەر ئەو کۆمپانیایانەی کە کارمەندی بێ مۆڵەت دادەمەزرێنن و وتی، "ئێمە تەنیا سەرنجمان لەسەر ئەو کەسانە نییە کە بە نایاسایی لێرە کاردەکەن، بەڵکو لەسەر ئەو کۆمپانیا ئەمریکییانەشە کە دۆخی ئەو کارمەندانە دەقۆزنەوە."

ئەوەی پێویستە بیزانیت: ئەم هەنگاوە نوێیانە بەشێکن لە جێبەجێکردنی بەڵێنەکانی ئیدارەی نوێی ترەمپ بۆ توندترکردنی سیاسەتەکانی کۆچکردن بۆ ئەمریکا.

باکگراوند: لە یەکەم ڕۆژی دەستبەکاربوونیدا، دۆناڵد ترەمپ، سەرۆکی ئەمریکا بڕیاریدا بە ناردنەوەی کۆچبەران بۆ وڵاتەکانیان و زیاتر لە هەزار کۆچبەر لەڕێگەی فڕۆکەوە نێردرانەوە بۆ ئەمریکای لاتین، بەڵام بەشێک لە وڵاتانی ئەو ناوچەیە ڕەتیانکردەوە کە ڕێگە بە نیشتنەوە ئەو فڕۆکانەی ئەمریکا بدەن.