کرێملین ئامادەیی دانوستان لەگەڵ ئۆکراینا دەردەبڕێت

ئاڤا نیوز

لەبارەی وادەی دەستپێکردنی خولێکی نوێی دانوستانەکانی ئاشتی نێوان ڕووسیا و ئۆکراینا، کۆشكی سەرۆکایەتیی ڕووسیا ئاشکرای دەکات، کار بۆ دیاریکردنی ڕۆژێک دەکەن بۆ ئەوەی کۆبوونەوەکە ئەنجام بدرێت.

 

چیرۆکی سەرەکی: ئۆکراینا بۆ کۆتاییهێنان بە جەنگ پێشنیازی گەڕێکی دیکەی دانوستانی ئاشتی لەگەڵ ڕووسیا بۆ هەفتەی داهاتوو کردووە، ئەمەش دوای ئەوەی کە دانوستانەکان لە سەرەتای مانگی شەشەوە ڕاگیراون تاوەکو ئێستا هەردوو لایەن تەنیا دوو گەڕی دانوستانیان بە نێوەندگیری تورکیا ئەنجامداوە.

لێدوانی فەرمی: دیمیتری پیسکۆف، وتەبێژی کرێملین ڕایگەیاند، هەر کاتێک لەسەر وادەی کۆبوونەوەکەمان ڕێککەوتین، دەستبەجێ ئاگادارتان دەکەینەوە، هاوکات، کاری زۆری دیپلۆماسی هەیە پێویستە ئەنجام بدرێت.

ئەوەی لەبارەیەوە دەگوترێت: ڕۆژنامەی ئیندیپێندنتی تورکی، بە پشتبەستن بە سەرچاوە دیپلۆماسییەکان ڕایگەیاندووە کە ئەگەر هەیە لە کۆتایی ئەم هەفتەیەدا خولێکی نوێ دانوستانەکانی نێوان ڕووسیا و ئۆکراینا بەڕێوەبچێت.

باکگراوند: لە ساڵی 2022ـەوە ڕووسیا هێرشەکانی بۆ سەر ئۆکراینا دەستپێکردووە و تا ئێستاش بەردەوامە و ڕووسیا بەشێکی زۆری خاکەکەی داگیر کردووە و بە هەزاران سەرباز لە هەردوولا کوژراون و چەندین جار هەوڵدراوە بۆ کۆتاییهێنان بەم جەنگە بەڵام تاوەکو ئێستا نەتوانراوە ئاگربەستێکی گشتگیر بێتە ئاراوە.