حیزبوڵڵای عێراق بۆ سوودانی: دەبێت هێزەکانی ئەمریکا عێراق جێبهێڵن

ئاڤا نیوز

بۆ پرسی ‌كشانه‌وه‌ی هێزه‌كانی ئه‌مریكا له‌ عێراق، کەتیبەکانی حیزبوڵڵای عێراق هۆشداری ده‌داته‌ محه‌ممه‌د شیاع سودانی سه‌رۆكوه‌زیرانی عێراق و دەڵێت " ئه‌مریكییەكان  دوو مانگیان ماوه‌ بۆ ئه‌وه‌ی عێراق به‌جێبهێڵن، له‌دوای ئەو وادەیە، هه‌ڵوێستی جیاوازمان ده‌بێت".

وێنە گەورەکە: بەهۆی ئەوەی ئەمریکا بەردەوام چەکدار و گرووپە شیعەکانی عێراق تۆمەتبار دەکات بە هاوکاریکردنی ئێران، ئەو گرووپانە داوا دەکەن کە هێزەکانی ئەمریکا عێراق جێبهێڵن.

لێدوانی فەرمی: ئەبو عەلی عەسکەری، بەرپرسی سەربازی کەتیبەکانی حیزبوڵڵای عێراق بڵاویکردەوە : هێزەکانی ئەمریکا ته‌نیا دوو مانگیان ماوه‌ تاوەکو عێراق بە یەکجاری به‌جێبهێڵن، بەڵام تا ئێستا هه‌ستمان به‌ هیچ گۆڕانكارییه‌ك ‌ له‌ پێگه‌ و ئامادەکاری بۆ کشانەوەی ئه‌و هێزانه‌ نه‌كردووه ".

عەسکەری جەخت لەوە دەکاتەوە ده‌بێت حكومه‌ت پابه‌ند بێت به‌و خاڵانه‌ی كه‌ سەبارەت بەکشانەوەی هێزەکانی ئەمریکا لەعێراق لە سه‌ری ڕێككه‌وتین و پێویستە له‌ ئۆپه‌راسیۆنه‌ هاوبه‌شه‌كان و فڕۆكه‌خانه‌ و بنکەی سەربازی عه‌ین ئه‌سه‌د دووریان بخاته‌وه‌ و هه‌موو فڕۆكه‌كانیان له‌ ئاسمانی عێراق بكێشێنێته‌وه‌، بەپێچەوانەوە بۆچوونێكی جیاوازمان ده‌بێت.
 
زانیاریی زیاتر: عەسکەری ئاماژەی بەوەشکرد، هەرچەندە حیزبوڵڵای عێراق لەهەندێک ورده‌كاریی بۆچوونەکانی لەگەڵ ڕه‌وتی سه‌در و سه‌رایا سه‌لام جیاوازە، بەڵام لە پرسی کشانەوەی هێزەکانی ئەمریکا و هاوپەیمانان بۆچونی هاوبه‌شیان ‌هه‌یه‌.