کێشەی ڕاکێشانی پارە لە ATM ـەکانی کەلار چارەسەر دەکرێت

ئاڤا نیوز

نزیکەی دوو هەزار پێشمەرگەی یەکەی 80 بەهۆی کێشەیەک لە ATM نەیانتوانی ئەمڕۆ مووچەکانیان وەرگرن، دوای بەدواداچوونی ئاڤا کێشەکەیان چارەسەرکرا.

وێنە گەورەکە: ژمارەیەک پێشمەرگەی یەکەی 80 کارتی بانکی ئیسلامی عێراقیان هەیە، مانگەکانی ڕابردوو لە سنووری کەلار بەبێ کێشە مووچەکانیان ڕاکێشاوە، بەڵام ئەمڕۆ کاتێک چوون بۆ ئەوەی مووچەی مانگی پێنج وەرگرن، پارە نەهاتووە.

زانیاریی ئاڤا: ئاڤا تیمی هەژماری من ـی لەگرفتەکە ئاگادارکردەوە و دەرکەوت کە کێشەکە پەیوەندی بە گرفتێکی تەکنیکی هەبووە و دوای کەمتر لە یەک کاتژمێر چارەسەرکرا، تیمی هەژماری من بە ئاڤای گوت، "ئێستا دەتوانن بڕۆن بۆ لای ئامێرەکانی ATM و پارەکانیان ڕابکێشن."

ئەوەی پێویستە بیزانیت: لەسنووری قەزای کەلار چوار ئامێری ئەی تی ئێم دانراون، هیچیان هی بانکی ئیسلامی عێراق نین، بەمەش ئەوانەی سەر بەو بانکەن و پارە ڕادەکشێن عمولەی زیاتریان لێدەگێڕدرێتەوە.