ئاگادارییەک لە بارەی پڕکردنەوەی فۆرمی ئەلیکترۆنیی خۆراک: خۆتان تۆمار بکەن

ئاڤا نیوز

دوو مانگە پڕکردنەوەی فۆرمی ئەلیکترۆنیی خۆراک لە پارێزگاکانی هەرێمی کوردستان دەستیپێکردووە، وەزارەتی بازرگانی ئاگاداریی هاووڵاتیان دەکاتەوە بۆ ئەوەی پێش کۆتاییهاتنی وادەکە ناوی خۆیان تۆماربکەن و قۆناغی دووەم دەست پێ بکات.

 

وێنە گەورەکە: لە هەرێمی کوردستان پێنج ملیۆن و 350 هەزار کەس لە فۆڕمی خۆراک سوودمەند دەبن، تاوەکو ئێستا نزیکەی چوار ملیۆن کەس خۆیان تۆمارکردووە، پێنج ڕۆژ ماوە بۆ ئەوانەی ماون خۆیان تۆمار بکەن.

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت، "ئەگەر ڕێژەی تۆمارکردن پێش 01-08-2025 بگاتە 85% ئەوا قۆناغی دووەم دەستپێدەکەین و ڕوونکردنەوە لەسەر شێوازی تۆمارکردنی هاوسەرانی نوێ بڵاو دەکەینەوە."

 

ژمارەکان وادەڵێن: بەگوێرەی ئامارەکانی وەزارەتی بازرگانیی هەرێمی کوردستان ڕێژەی تۆمارکردن لە پارێزگاکاندا بەم شێوەیە:-

-هەولێر: 81%
-سلێمانی: 78%
-دهۆک: 72%
-هەڵەبجە: 85%