تەندروستیی هەولێر: ساڵانە نزیکەی 200 توشبووی نوێی ڤایرۆسی جگەر تۆمار دەکرێن

ئاڤا نیوز

 

بەپێی ئامارەکانی بەڕێوەبەرایەتیی گشتیی تەندروستیی هەولێر، ساڵانە نزیکەی 200 توشبووی نوێی ڤایرۆسی جگەر لە سنووری پارێزگای هەولێر تۆمار دەکرێن، ژمارەیەک لەو توشبووانە کەسانی بیانین.

 

وێنە گەورەکە: ڕێککەوتی 28/7ـی هەموو ساڵێک ڕۆژی جیهانیی بەرەنگاربوونەوەی ڤایرۆسی جگەرە، ساڵانە لەم ڕۆژەدا چەندین چالاکی بۆ بڵاوکردنەوەی هۆشیاری و خۆپارێزی لە نەخۆشییەکە بڵاو دەکرێنەوە، لە هەرێمی کوردستانیش لەپاڵ پلانی کۆنترۆڵکردنی نەخۆشییەکە، لەو ڕۆژەدا هەڵمەتی هۆشیاری ئەنجام دەدرێن.

 

لێدوانی فەرمی: د. دلۆڤان محەممەد، بەڕێوەبەری گشتیی تەندروستیی هەولێر بە ئاڤا میدیای گوت: ساڵانە نزیکەی 300 هەزار پشکینینی ڤایرۆسی جگەر دەکرێن و هەموو ساڵێک نزیکەی 200 توشبووی نوێ تۆمار دەکرێن.

 

- بەشێک لە توشبووان کەسانی بیانین و زۆربەیان دەگەڕێنرێنەوە وڵاتەکانی خۆیان، ئەوانەشی خەڵکی هەرێمی کوردستانن لە ڕێگەی بەشی پاراستنی تەندروستی بەدواداچوون و چارەسەرییان بۆ دەکرێت.

 

زانیاریی زیاتر: لە چەند دۆخێکی تایبەتدا دەبێت پشکنینی ڤایرۆسی جگەر ئەنجام بدرێت:
- هەموو ئەو بیانیانەی داوای نشینگە دەکەن. 
- بۆ هەموو ئەو کەسانەی نەشتەرگەرییان بۆ دەکرێت.
-  هەموو حاڵەتێکی خوێن بەخشین.
-  هەموو ئەو کەسانەی خوێن وەردەگرن.

 

ئەمەش بزانە: ڤایرۆسی جگەر یەکێکە لە نەخۆشییە گوازراوەکان، پێنج جۆری سەرەکی هەیە و هەموویان کار لە جگەری مرۆڤ دەکەن، جۆری B و C مەترسیدارترین جۆرن و هۆکاری سەرەکیی شێرپەنجەی جگەرن.