زیاتر لە 400 کەس داوای یەکلایکردنەوەی چارەنووسیان لە لیوا هاوبەشەکان دەکەن

ئاڤا نیوز

ئەو کەسانەی لە لیوا هاوبەشکان چاوپێکەوتنیان لەگەڵ کراوە چاوەڕوانن ڕاهێنانیان پێ بکرێت و دەستبەکاربن داوا دەکەن چارەنووسیان یەکلایی بکرێتەوە، بەرپرسێک لە فەرماندەیی هێزە هاوبەشەکانی عێراق لەوبارەیەوە دەڵێت 'ئێستا بابەتەکە لای وەزارەتی دارایی عێراقە'.

چیرۆکی سەرەکی: 430 کەس لە ڕۆژی 2024-07-15، لە لیوای 20ـی هاوبەشی پێشمەرگە و سوپای عێراق لە دیالە چاوپێکەوتنیان لەگەڵ کراوە، بۆ ئەوەی بچنە ڕیزی لیوا هاوبەشکانەوە، بەڵام وەک خۆیان دەڵێن تاوەکو ئێستا چاوەڕوانی ئەوەن کە بانگ بکرێن و ڕاهێنانیان پێ بکرێت.

لێدوانی فەرمی: عەبدولخالق تەلعەت، نوێنەری هەرێمی کوردستان لە فەرماندەیی هێزە هاوبەشەکانی عێراق بە ئاڤا میدیای ڕاگەیاند: ئەو کەسانە لە جیاتی دانانیان پێ دەکرێت، لە شوێنی ئەوانە دادەنرێن کە پێشتر ناویان بەهۆی کەموکوڕی مامەڵەکانیان لە ڕیزی لیوا هاوبەشەکان دەرهێنرابوو.

٠ ناوی ئەو 430 کەسەمان بۆ وەزارەتی بەرگری بەرزکردووەتەوە، ئەوانیش بۆ وەزارەتی دارایی عێراقیان بەرزکردووەتەوە، هێشتا ڕەزامەندی بۆ تەرخانکردنی شایستەی داراییان نەدراوە.

٠ ئێمە قسەمان لەگەڵ وەزارەتی بەرگری کردووە، پێیان وتین کە وەزارەتی دارایی وەڵامی نەداوینەتەوە، کە وەڵامدراینەوە دەست بە ڕاهێنان دەکەین.

٠ پێویستە وەزارەتی دارایی عێراق شایستەی دارایی بۆ ئەو 430 کەسە تەرخان بکات.

ئەوەی پێویستە بیزانیت: حکومەتی عێراق دوو لیوای هاوبەشی لە پێشمەرگە و سوپا بۆ ئەو ناوچانە دروست کردووە، کە بۆشای ئەمنیان تێدایە، بەوتەی عەبدولخالق تەلعەت 'ئێستا دۆخی ئەمنی ئەو ناوچانە بە بەراورد بە پێشتر زۆر باشە'.