مەزڵووم عەبدی: لەژێر یەك ئاڵا و یەك وڵات، هەسەدە دەبێتە بەشێك لە وەزارەتی بەرگریی سووریا

ئاڤا نیوز

مەزڵووم عەبدی دەڵێت، لەژێر یەك ئاڵا و یەك وڵات، هێزەكانی سووریای دیموكرات 'هەسەدە' دەبێتە بەشێك لە وەزارەتی بەرگریی سووریا.

 

لێدوانی فەرمی: مەزڵووم عەبدی، فەرماندەی گشتیی هێزەكانی سووریای دیموكرات 'هەسەدە' لە هەژماری فەرمیی خۆی لە تۆڕی كۆمەڵایەتی 'ئێكس' نووسیویەتی، "هێزەكانی سووریای دیموكرات لە سەرەتای دامەزراندنییەوە، پابەندە بە پاراستنی یەكڕیزیی سووریا و ئاسایشی سەرجەم پێكهاتەكانی، ئەمڕۆ بەدوای چارەسەرێكی نیشتمانیدا دەگەڕێین كە یەكێتیی وڵات لەژێر یەک ئاڵا بپارێزێت و لەشکرێکی نەتەوەیی یەکگرتوو دابمەزرێت کە گەرەنتی ئاسایش و سەقامگیری بۆ هەموو سوورییەکان بکات".

 

زانیاریی زیاتر: فەرماندەیی گشتیی هێزە چەكدارەكانی هەسەدە ئاماژەی بەوەشكردووە، لەگەڵ حكومەتی سووریا لەسەر ئەوە ڕێككەوتووین كە هەسەدە ببێتە بەشێك لە سیستمی بەرگریی یەكگرتووی سووریا و لە کۆبوونەوەی داهاتووی پاریسدا، باسی میکانیزمی تێکەڵبوون لەگەڵ سوپای سووریادا دەکەین.

مەزڵووم عەبدی باسی لەوەشكردووە، "هەموومان لەسەر یەکپارچەیی سووریا کۆکین و لامەرکەزییەت بە واتای دابەشکردنی وڵات نایەت؛ سووریا یەک سوپای دەبێت نەک دوو سوپا و سوپای سووریا لە چوارچێوەی مەرکەزییەتێکی سەربازیدا دەبێت.

 

فەرماندەی هێزەکانی سووریای دیموکرات ئاماژەی بە كۆبوونەوەكەی لەگەڵ ئەحمەد شەرع، سەرۆكکۆماری سووریا كردووە كە كۆبوونەوەكەیان ئەرێنی بووە و سێ كاتژمێر گفتوگۆیان كردووە و توانیویانە بگەنە ڕێككەوتن. دووپاتیشی كردەوە، هەوڵدەدەن ئاگربەست لە باكووری ڕۆژهەڵاتی سووریا بگۆڕن بۆ ئاشتییەكی هەمیشەیی.