هەرێمی کوردستان لە ڕووبەڕووبوونەوەی کۆچی نایاسایی هاوکاریی نەتەوە یەکگرتووەکان دەکات

ئاڤا نیوز

بەرپرسی بەشی پەیماننامەکانی ڤییەننا بۆ بەرەنگاربوونەوەی بازرگانیکردن بە مرۆڤ و کۆچی نایاسایی، پێزانینی خۆی بۆ دامودەزگاکانی حكومەتی هەرێمی کوردستان دەردەبڕێت، لە هەماهەنگیكردن بۆ جێبەجێکردنی پڕۆژەکانیان.

چیرۆکی سەرەکی: ئەمڕۆ، سەفین دزەیی، بەرپرسی پەیوەندییەکانى دەرەوەی هەرێمی کوردستان، لەگەڵ مارتن ڕیڤ، بەرپرسی بەشی پەیماننامەکانی ڤییەننا بۆ بەرەنگاربوونەوەی بازرگانیکردن بە مرۆڤ و کۆچی نایاسایی لە ئاژانسی (یو ئێن- ئۆ دی سی) سەر بە نەتەوە یەکگرتووەکان کۆ بووەوە؛ گفتوگۆیان لەبارەی کار و چالاکییەکانی عێراق و هەرێمی کوردستان لە بەرەنگاربوونەوەی تاوانە ڕێکخراوەکاندا کرد.

ئەوەی پێویستە بیزانیت: دەزگا پەیوەندیدارەکانی حكومەتی هەرێمی کوردستان لە دەسەڵاتەکانی دادوەری، ئەمنی و پەیوەندییەکانی دەرەوە، چەندین ڕێککەوتن و یاداشتی لێکتێگەیشتنیان لەگەڵ وڵاتانی ئەورووپا و ڕێکخراوە جیهانییەکاندا هەیە بۆ پرسی بەرەنگاربوونەوەی تاوانە ڕێکخراوەکان، لە پێناو بنبڕکردنی تاوانەکانی بازرگانیکردن بە ماددەی هۆشبەر و بەرەنگاربوونەوەی تۆڕەکانی بەقاچاخبردنی پەنابەران بۆ وڵاتانی ئەورووپا لە ڕێگەی کۆچی نایاساییەوە.

لێدوانی فەرمی: سەفین دزەیی، بەرپرسی پەیوەندییەکانی دەرەوەی هەرێمی کوردستان، جەختی لە هاوکارییەکانی حكوومەتی هەرێم کردەوە بۆ سەرخستن و بەئامانجگەیشتنی بەرنامەکانی ئاژانسەکانی نەتەوە یەکگرتووەکان؛ بەتایبەت لە پرسی ڕێگریکردن لە تەشەنەسەندنی ئاڵوگۆڕی ماددە هۆشبەر و کارتێکەرە عەقڵییەکان لە لایەک، و ڕووبەڕووبوونەوەی تۆڕەکانی قاچاخچێتی کە پەنابەران بە ڕێگەی نایاسایی بەرەو وڵاتانی ئەورووپا دەبەن، لە لایەکی دیکەوە.

لە لایەکی دیکەوە: سەرۆکی شاندی ڕێکخراوی (یو ئێن-ئۆ دی سی) باسی لە پڕۆژەکانی ئاییندەیان لە عێراق و هەرێمی کوردستان کرد، هاوکات پێزانینی خۆی بۆ هەوڵ و کارەکانی دامودەزگاکانی حكومەتی هەرێمی کوردستان دەربڕی، لە هاوکاری و هەماهەنگییان لە جێبەجێکردنی پڕۆژەکانیاندا.