ئەنجوومەنی وەزیرانی کوردستان لەبارەی مووچە و هەناردەکردنەوەی نەوت کۆدەبێتەوە

ئاڤا نیوز

 

بڕیارە سبەی چوارشەممە، ئەنجوومەنی وەزیرانی هەرێمی کوردستان کۆبوونەوەی ئاسایی خۆی ئەنجام بدات و تێیدا چەند تەوەرێکی گرنگ و هەستیار تاوتوێ بکرێن، لە سەرووی هەمووشیانەوە پرسی مووچەی فەرمانبەران و دەستپێکردنەوەی هەناردەی نەوتی هەرێم.

زانیاریی ئاڤا: بەپێی کارنامەی کۆبوونەوەکە، کە سەرۆکوەزیران مەسرور بارزانی سەرپەرشتی دەکات، ئەنجوومەنی وەزیران گفتوگۆ لەبارەی چارەنووسی مووچەی مانگەکانی شەش و حەوتی فەرمانبەرانی هەرێمی کوردستان دەکات.

 

زانیاریی زیاتر: تەوەرێکی دیکەی سەرەکیی کۆبوونەوەکە، تاوتوێکردنی ڕێگاکان و میکانیزمی دەستپێکردنەوەی هەناردەکردنی نەوتی کوردستان دەبێت، کە ماوەیەکی زۆرە بەهۆی کێشەکان لەگەڵ بەغدا و بڕیاری دادگای ناوبژیوانیی پاریسەوە ڕاگیراوە و زیانێکی گەورەی ئابووری بە هەرێم و عێراق بە گشتی گەیاندووە.

ئەوەی پێویستە بیزانیت: هەر لە کۆبوونەوەکەدا، چەند پێشنیازێک سەبارەت بە خزمەت، خانەنشینی، مووچە و شایستە داراییەکانی هێزەکانی پێشمەرگەی کوردستان دەخرێنەڕوو و گفتوگۆیان لەسەر دەکرێت.

 

زانیاریی پەیامنێر: کوردستان حەسەن، پەیامنێری دیپلۆماسی ئاڤا لەبارەی کۆبوونەوەکە ڕایگەیاند، لە کۆبوونەوەی ئەمڕۆی ئەنجوومەنی وەزیران مووچەی مانگەکانی حوزەیران و تەممووزی مووچەخۆران و پرسی هەناردە کردنەوەی نەوت گفتوگۆی لەبارەوە دەکرێت، ژمارەیەک پێشنیار دەربارەی مووچە و خانەنشینی پێشمەرگە دەخرێنەڕوو بۆ ئەوەی بڕیاری پێویستیان لەبارەوە بدرێت، پێشنیارەکانیش ئەمانەن:

یەکەم: هەژمارکردنی مووچە و شایستە داراییەکانی پێشمەرگە بەپێی یاسای ژمارە 38ی ساڵی 2007.
دووەم: ماف و ئیمتیازاتی کەمئەندامانی سەنگەر و شەهیدان بە یاسا کارپێکراوەکانی هەرێمی کوردستان دیاری بکرێت.
سێیەم: سوود لە یاسا کارپێکراوەکانی عێراق وەربگیرێت.
چوارەم: ئەو ئەفسەر و پلەدار و پێشمەرگانەی تەمەنی یاساییان تەواو کردووە و خانەنشین دەکرێن، ببەخشرێن لە لێکەوتە یاسایی و داراییەکان.
پێنجەم: ڕێکخستنەوەی ناردنی مامەڵەی ئەفسەر و پێشمەرگە بۆ بەڕێوەبەرایەتیی گشتیی خانەنشینی.
شەشەم: بابەتی دەستلەکار هەڵگرتنی ئەفسەران لەکاتی خانەنشین بوونیان.
حەوتەم: بابەتی خزمەتی فەسلکراوانی سیاسی، کەسوکاری پلەیەکی شەهیدان، زیندانیکراو و ڕاگیراوانی سیاسی.
هەشتەم: بابەتی پلە بەرزکردنەوەی ئەفسەران و کارمەندان.
نۆیەم: بابەتی سەرمووچەی ئەفسەران و پلەداران و پێشمەرگە.
دەیەم: بابەتی خانەنشینی ئەو ئەفسەرانەی شایستەی ئەوەن بە پلەی بەرزتر خانەنشین بکرێن.