عێراق بڕیارێکی لە بەرژەوەندی کوردانی ئێزدی دا

ئاڤا نیوز

لە هەنگاوێکی گرنگدا بۆ پشتیوانیکردنی کوردانی ئێزدی، ئەنجوومەنی وەزیرانی عێراق بڕیاری دا مامەڵەکانی خاوەندارێتیی خانووەکانیان لە شنگال و دەوروبەری لە سیستمی پارەدانی ئەلیکترۆنی ببەخشێت، بەمەبەستی خێراکردن و ئاسانکاری لە پرۆسەی تۆمارکردنی موڵکەکانیاندا.

 

چیرۆکی سەرەکی: ئەمڕۆ سێشەممە، لە سییەمین کۆبوونەوەی ئاسایی ئەنجوومەنی وەزیراندا، بڕیارەکە پەسەند کرا کە تایبەتە بەو خانووانەی دەکەونە هەریەک لە قەزای شنگال و ناحیەکانی قەحتانیە، عەدنانیە و حەتین، کە پێشتر بەپێی بڕیاری ژمارە 365ـی ساڵی 2022ی ئەنجوومەنی وەزیران دیاری کرابوون.

 

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، بڕیارە نوێیەکە، ئەو هاووڵاتییە ئێزدییانەی مامەڵەی تۆمارکردنی خانووەکانیان دەکەن، تەنیا بۆ ئەم بابەتە لە سیستمی وەرگرتنی پارەی ئەلیکترۆنی دەبەخشرێن.

 

لەهەمان کاتدا: بەگوێرەی ڕاگەیێنراوەکە، بانکی ناوەندیی عێراق و بانکە تایبەتمەندەکان کاتژمێرەکانی کارکردن و وەرگرتنی پارەکان درێژ دەکەنەوە، بۆ تەواوکردنی پرۆسەی خاوەندارێتی بۆ پێکهاتەی ئێزدی لە ماوەیەکی پێوانەییدا.