لە ڕووسیا بوومەلەرزەیەکی گەورە ڕوویدا و ژمارەیەک کەسیش برینداربوون

ئاڤا نیوز

بوومەلەرزەیەکی بەهێز نیمچەدوورگەی کامچاتکای ڕووسیای هەژاند و لە هەندێ ناوچەی ئەو وڵاتە و ژاپۆن بووە هۆی دروستبوونی تسونامی.

چی ڕوودەدات: بەرەبەیانی ئەمڕۆ چوارشەممە، شەپۆلی تسونامی بوومەلەرزەیی بە گوڕی 8.8 پلە لە هەندێک ناوچەی کەناراوی زەریای هێمن کە بەشێك  لە نیمچە دوورگەی کامچاتکای ڕووسیای گرتەوە.

ڕاگەیێنراوی فەرمی: دەستەی جیۆفیزیکی ئەکادیمیای زانستی ڕووسیا پشتڕاستیکردەوە، بوومەلەرزەکەی ئەمڕۆ ، لە دوای بەهێزترین بوومەلەرزەی ساڵی 1952 بووە و شەپۆلی مەترسیداری تسونامی بەدرێژایی کەناراوەکانی لێکەوتەوە.

لەلایەکی دیکەوە: وەزارەتی کاروباری نائاسایی ڕووسیا بڵاویکردەوە، تسونامی دروستبووە و بەشێک لە شارۆچکەی سڤیرۆ کورلیسکی داوە و بەو هۆیەوە نزیکەی 2 هەزار کەس لە دانیشتووانەکەی بۆ شوێنی سەلامەت گوێزراونەتەوە.

زانیاریی بەدەستهاتوو: میدیای فەرمی ڕووسیا بڵاویکردەوە، لە ئەنجامی بوومەلەرزەکە ژمارەیەک کەس بریندار بوون، بەڵام برینی هیچ کامیان سەخت نییە.