لە کەرکووک هاوپەیمانیی عەرەبی سەلوا مەفرەجی لە ڕیزەکانی دەردەکات

ئاڤا نیوز

هاوپەیمانیی عەرەبی لە کەرکووک، بڕیاری دەرکردنی سەلوا مەفرەجیی، ئەندامی ئەنجوومەنی پارێزگا، لە ڕیزەکانیدا ڕاگەیاند، ئەمەش بەهۆی بەشداریکردنی لە دانیشتنێکی ئەنجوومەنەکە. لەبەرامبەردا، مەفرەجی ڕایگەیاند کە بەشداریکردنی بۆ بەرگریکردن بووە لە دەنگی دەنگدەرانی.

 

وێنە گەورەکە: ڕۆژی سێشممە  29ـی 7ـی 2025، دوای نزیکەی چوار مانگ ئەنجوومەنی پارێزگای کەرکووک بڕیاڕی دا دەست بە کۆبوونەوەکانی بکاتەوە، بەڵام شکستی هێنا و نەیتوانی نیساب تەواو بکات.

 

ڕاگەیێنراوی فەرمی: بەگوێرەی ڕاگەیێنراوی هاوپەیمانیی عەرەبی، مەفرەجی "بێ هیچ پاساوێکی ڕوون جیابووەتەوە" و بەشداریکردنی لە دانیشتنێکی ناتەواودا بە "پشتکردنە لە چاکە" ناوبرد، بەتایبەت دوای ئەو پشتیوانییەی لەلایەن سەرۆکی هاوپەیمانیی سیادە و هاوپەیمانیی عەرەبییەوە لێی کرابوو.

 

لەهەمان کاتدا: هەر بەگوێرەی ڕاگەیێنراوەکە، هەڵوێستەکەی مەفرەجی "لەگەڵ ئیرادەی جەماوەرەکەی و هەڵوێستەکانی هاوپەیمانێتییەکەدا ناگونجێت" کە داوای نوێنەرایەتیی ڕاستەقینەی هەموو پێکهاتەکانی دەکرد.

 

بۆچوونی لایەنی بەرامبەر: سەلوا مەفرەجی بڕیارەکەی ڕەتکردەوە و جەختی کردەوە کە کۆتایی بە بایکۆت هێناوە چونکە "زیانی زیاتر بووە لە سوود." وتیشی: "ئەمڕۆ دەگەڕێمەوە بۆ کورسییەکەم تا نوێنەرایەتیی ئەوانە بکەم کە لە ڕێگەی سندووقەکانی دەنگدانەوە منیان گەیاندووەتە ئێرە." مەفرەجی ئاماژەی بەوەشکرد کە بەشداریکردنی کاراترین ڕێگەیە بۆ خزمەتکردنی پێکهاتەی عەرەب و داوای "تێپەڕاندنی ناکۆکییە سیاسییەکان"ی کرد لەپێناو بەرژەوەندیی کەرکووکدا.

 

ئەوەی پێویستە بیزانیت: ئەم پێشهاتە لە کاتێکدایە کە گرژیی سیاسی لە ئەنجوومەنی پارێزگای کەرکوکدا بەردەوامە، بەتایبەت دوای کشانەوەی دوو ئەندامی دیاری دیکەی هاوپەیمانیی عەرەبی و بەردەوامیی بایکۆتی نوێنەرانی بەرەی تورکمانی و پارتی دیموکراتی کوردستان. لەم چوارچێوەیەشدا، سەرۆکایەتیی ئەنجوومەن هۆشداریی داوە کە بەپێی داواکاریی دیوانی چاودێریی دارایی، ڕێکاری یاسایی و دارایی بەرامبەر ئەندامە ئامادەنەبووەکان دەگرێتەبەر.