ئاماری نوێ؛ ڕێژەی هەژاری لە عێراق و هەرێمی کوردستان بۆ 10.8% دابەزیووە

ئاڤا نیوز

 

وەزارەتی پلاندانانی عێراق ڕاپۆرتی تایبەت بە هەژاریی "فرەڕەهەندی" بڵاوکردەوە و ڕایگەیاند، ساڵی 2018 ڕێژەی هەژاری فرەڕەهەند 11.4% بووە، بەڵام ساڵی ڕابردوو ڕێژەکە بۆ 10.8% دابەزیووە، ئاشکراشی دەکات کە بێبەشبوون لە خوێندن دیارترین ڕواڵەتی هەژارییە لە عێراق و پارێزگاکانی هەرێمی کوردستانیش باشترین پێوەرەکانیان بۆ دابەزاندنی هەژاری جێبەجێ کردووە.

 

ئەوەی پێویستە بیزانیت: بەگوێرەی وەزارەتی پلاندانانی عێراق ساڵی 2022 ڕێژەی هەژاری (لەسەر بنەمای داهاتی تاکە کەس و خێزان) لە وڵاتدا 24% بووە، بەڵام ساڵی ڕابردوو ڕێژەکە بۆ  17.5% دابەزیووە، بەمەبەستی زیاتر دابەزاندنی ئەو ڕێژەیەش وەزارەتەکە ستراتیژییەکی پێنج ساڵەی ڕاگەیاندووە و دەیەوێت لەو ماوەیەدا ڕێژەکە بگەیێنێتە 10%.

 

لێدوانی فەرمی: محەممەد تەمیم، وەزیری پلاندانانی عێراق لەمیانی بڵاوکردنەوەی ڕاپۆرتەکەدا ئاماژەی بەوەکرد، "ڕێژەی هەژاری لە ڕەهەندە جیاوازەکانەوە لە ساڵی 2018دا 11.4% دابەزیووە بۆ 10.8% لە ساڵی 2024دا، ئێمە پشتیووانی بەرنامەی هەمەجۆر و فراوان دەکەین بۆ زیاتر دابەزاندنی ئەو ڕێژەیە، هاوکات بۆ یەکەمجاریش کار لەسەر ئامادەکردنی ڕاپۆرتی تایبەت بە هەژاری لەنێوان ژنان و منداڵان دەکەین، کە بوارەکانی تەندروستی، زانستی و زۆر بواری دیکەی تایبەت بەم دوو توێژە لە خۆدەگرێت". 

 

ژمارەکان وادەڵێن: ڕێژەی هەژاری بەگوێرەی ڕاپۆرتەکە: 

-ڕێژەی هەژاری ساڵی 1995 - 75% بووە.
-ڕێژەی هەژاری ساڵی 2007 - 22.9% بووە.
-ڕێژەی هەژاری ساڵی 2012- 18.9% بووە.
-ڕێژەی هەژاری ساڵی 2018 - 20.1% بووە.
-ڕێژەی هەژاری ساڵی 2024 - 17.5% بووە.

پێوەرە سەرەکییەکانی ڕاپۆرتەکە: 

-بژێویی ژیان.
-خوێندنی باش. 
-تەندروستیی باش و خۆشگوزەرانی. 

 

دیارترین ڕواڵەتەکانی هەژاری لە عێراق بەگوێرەی پێوەرە جیهانییەکان:

-بێبەشبوون لە خوێندن 61%.
-بێبەشبوون لە تەندروستی 33.1%.
-بێبەشبوون لە داهات (ناوخۆیی) 18.9%.
-بێبەشبوون لە خزمەتگوزاتگوزارییەکان بەگشتی 6%.

 

ئەو پارێزگایانەی باشترین پێوەرەکانیان بۆ دابەزاندنی هەژاری جێبەجێ کردووە:

-پارێزگاکانی هەرێمی کوردستان 
-بەغدا و کەرکووک

 

ئەو پارێزگایانەی ڕێژەی هەژاری فرەڕەهەند تیایاندا بەرزە:

-موسەننا لە باشووری عێراق.
-پارێزگا ڕزگارکراوەکانی دەستی داعش.