سەفین یاسین بوو بە سەرۆكی یانەی هەولێر

ئاڤا نیوز

ئومێد خۆشناو، پارێزگاری هەولێر ئاشكرای كرد كە لە ئەمڕۆوە سەفین یاسین، سەرۆكی یانەی هەولێرە و دەستەی تازەی هەڵبژێردراوی یانەكەش كارەكانی خۆیان دەكەن.

لێدوانی فەرمی: ئومێد خۆشناو، پارێزگاری هەولێر لە كۆنفڕانسێكی ڕۆژنامەوانیدا ڕایگەیاند: لە ئەمڕۆوە لاپەڕەیەكی نوێ لە كاركردنی یانەی هەولێر دەكرێتەوە و حكومەت و دامەزراوەكانی بەردەوام دەبن لە پشتیوانیكردنی یانەكە و پێشووتریش و ئێستاش سەرۆكوەزیران مەسرور بارزانی لە ڕووی دارایی و مەعنەوییەوە پشتیوانێكی سەرەكیی یانەكە بووە.

-ئەمڕۆ لەگەڵ دەستەی هەڵبژێدراو، كۆبوونەوەیەكمان ئەنجام دا و بڕیارمان دا بە پێكهێنانی لیژنەیەكی تەكنیكی بۆ دەستنیشانكردنی ڕاهێنەر و هێنانی یاریزانان، لیژنەیەكی داراییش پێكدێت داهاتەكانی یانەكە كۆدەكاتەوە و پێداویستییەكان تۆمار دەكات، كەسێك لەنێو دەستەی كارگێڕی دەبێتە گوتەبێژی یانە تەنیا ئەو ڕێگەپێدراوە كە بە ناوی یانەوە قسە بكات.

- سەفین یاسین كە لەنێو دەستەی گشتی بووە، لە ئەمڕۆوە سەرۆكی یانەی هەولێرە و لە ڕۆژانی داهاتوو ڕێككارە یاسایی و كارگێڕییەكانی تەواو دەبێت و وەك سەرۆكی یانە دەستبەكار دەبێت.

ئەوەی پێویستە بیزانیت: لە ڕابردوودا یانەی هەولێر چەند گرفتێكی هەبوو بۆ چارەسەركردنی دۆخی یانەكە لە ڕۆژی 15-7-2025 هەڵبژاردنی دەستەی كارگێڕیی یانەی هەولێر بەڕێوەچوو و دەستەیەكی نوێ هەڵبژێردران.