بەڕێوەبەری پسوولەی خۆراكی سلێمانی بۆ ئاڤا: تا 12ـی ئەمشەو خۆتان تۆمارنەكەن بەشەخۆراكی مانگێكتان دەبڕدرێت

ئاڤا نیوز

بەڕێوەبەری پسوولەی خۆراكی پارێزگای سلێمانی تایبەت بە ئاڤا ڕایدەگەیەنێت، هەر هاووڵاتیەك دوای سێی ئاب، فۆرمی ئەلیكترۆنی پسوولەی خۆراك پڕبكاتەوە، بەشەخۆراكی مانگێكی دەبڕدرێت، هەركەسێكیش لە دوای مانگی نۆوە فۆرمەكە پڕبكاتەوە، ئەوە دەبێت پارە بدات بۆ پڕكردنەوەی فۆرمەكە و بەهەمان شێوە بەشەخۆراكی مانگێكی دیكەشی لێ دەبڕدرێت.

وێنە گەورەكە: ئەو وادەیەی بۆ کۆتاییهاتنی پڕکردنەوەی فۆرمی خۆراک دیاریکراوە، لە كاتژمێر 12:00ـی شەو كۆتایی دێت، هەرچەندە خۆتۆماركردن لە ئاپەكە تاوەكو 31ـی ئەم مانگە بەردەوام دەبێت، بەڵام چەند گۆڕانكارییەكی بەسەردا دێت كە لە بەرژەوەندیی ئەو كەسانە نییە كە تا ئێستا فۆرمەكەیان پڕنەكردووەتەوە.

لێدوانی فەرمی: ئاراس محەممەد، بەڕێوەبەری پسوولەی خۆراک لە پارێزگای سلێمانی، تایبەت بە ئاڤا ڕایگەیاند، ئەوانەی تاوەكو ئێستا لە سیستمی ئەلیكترۆنی فۆرمی خۆراك خۆیان تۆمارنەكردووە، تاوەكو كاتژمێر 12ـی شەو کاتیان لەبەر دەستە، بەڵام ئەگەر دوای ئەو كاتە خۆیان تۆماربكەن، ئەوا بەشە خۆراكی مانگێكیان لێ دەبڕدرێت.

ڕوونیشی كردەوە، لە ڕێككەوتی 1ـی 9 بەدواوە، هەركەسێك لە سیستمەكە خۆی تۆماربكات، ئەوا دەبێت بڕی 10 هەزار دینار بۆ پڕكردنەوەی فۆرمەكە بدات، ئەوەش لەكاتێكدا ئێستا بەخۆڕاییە.

لەلایەكی دیكەوە: هەر لەسەر ئەو پرسە، سیامەند قادر، بەڕێوەبەریی پسوولەی خۆراكی هەولێر تایبەت بە ئاڤا دەڵێت، لە سەرەتای مانگی نۆی ئەمساڵ،  هەر هاووڵاتییەک ئەگەر بیەوێت پسوولەکە بکاتە ئەلیکترۆنی، پێویستە بڕێک پارە بدات، وەزارەتی بازرگانیی عێراق، بۆ هەر مامەڵەیەک بڕی 10 هەزار دیناری دیاری کردووە، بەڵام وەزارەتی بازرگانیی حکومەتی هەرێمی کوردستان بە فەرمی داوای کردووە بکرێتە پێنج هەزار دینار، ئەگەر ڕەزامەندی بگەڕێتەوە ئەوە دەبێتە پێنج هەزار دینار.