لە هەولێر 30%ـی ئەوانەی فۆڕمی وەرگرتنی زەوییان پڕکردووەتەوە پێشووتر سوودمەند بوون

ئاڤا نیوز

پرۆسەی دابەشکردنی زەوی لە سنووری هەولێر دەستیپێکردووە و تاوەکو ئێستا تیروپشک بۆ دابەشکردنی نزیکەی 24 هەزار پارچە زەوی کراوە، لە وردبینی فۆرمەکان دەرکەوتووە 30%ـیان پێشووتر زەوییان وەرگرتووە.

وێنە گەورەکە: لەپاڵ هەشت ساڵ خزمەت، یەکێک لەمەرجە سەرەکییەکان بۆ وەرگرتنی زەوی نابێت داواکار پێشووتر لە پرۆسەی وەرگرتنی زەوی سوودمەند بووبێت، هەر کەسێک پێشووتر سوودمەند بووبێت ناوی دەردەهێنرێت.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر بە ئاڤای گوت، "پێش ئەوەی ناوی نوێ بڵاوبکەینەوە بەمەبەستی وەرگرتنی زەوی، دووبارە بە وردی پێداچوونەوە دەکەین، هەر ناوێک دوو ڕۆژی پێویستە، لەماوەی ڕابردوو 30%ـی ئەو فۆڕمانەی بۆمان گەڕانەتەوە پێشووتر لە وەرگرتنی زەوی سوودمەند بوون."

ئەمەش بزانە: بڕیارە سبەی تیروپشک بۆ دابەشکردنی هەزار پارچە زەوی لە سنووری کەورگۆسک بکرێت، هەنگاوی داهاتووش لە سنووری ناحییەی شەمامک دەبێت.