ڕووسیا: هەنگاوە سەربازییەکانی ترەمپ هیچ هەڕەشەیەک بۆ سەر ئێمە دروست ناکەن

ئاڤا نیوز

بەرپرسانی باڵای سەربازی و سیاسی ڕووسیا لە وەڵامی دۆناڵد ترەمپ بۆ جێگیرکردنی دوو ژێرئاوی هەڵگری چەکی ئەتۆمی لە نزیک سنورەکانی ڕووسیا، ڕایدەگەیەنن ئەم هەنگاوانە هیچ هەڕەشەیەک بۆ سەر ڕووسیا دروست ناکات.

چیرۆکی سەرەکی: دوای لێدوانەکانی دیمیتری میدڤێدیڤ، سەرۆکی پێشووی ڕووسیا کە تێیدا ئاماژەی بە توانای گەورەی ڕووسیا کرد لە ڕووی چەکی ئەتۆمەوە و هۆشداری بە ئەمریکا دا بۆ ئاگادرابوون لە مامەڵەکردن لەگەڵ مۆسکۆ، دۆناڵد ترەمپ، سەرۆکی ئەمریکا بڕیاریدا بە بڵاوەپێکردنی دوو ژێرئاوی هەڵگری چەکی ئەتۆم لە نزیک سنورەکانی ڕووسیا و ڕایگەیاند، ئەمە دوا ئاگادارکردنەوەیە.

لێدوانی فەرمی: لیونید ئیڤێلیڤ، جێگری سەرۆکی پەرلەمانی ڕووسیا (دۆما)، لە لێدوانێکیدا ڕایگەیاند: جێگیرکردنی دوو ژێرئاوی هەڵگری چەکی ئەتۆمی لە نزیک سنورەکانی ڕووسیا هیچ هەڕەشەیەک دروست ناکەن، مۆسکۆ ئاگاداری تەواوی ئەم جووڵە سەربازیانەی واشنتە و ئامانجی ئەم هەنگاوە سەربازییانە دەزانین، هەموو هەوڵێک بۆ ترساندنی خەڵکی ڕووسیا بێهوودەیە.

زانیاریی زیاتر: ناکۆکیەکانی نێوان دۆناڵد ترەمپ، سەرۆکی ئەمریکا و دیمیتری میدڤێدیڤ، سەرۆکی پێشووی ڕووسیا  و جێگری ئێستای سەرۆکی ئەنجوومەنی ئاسایشی ئەو وڵاتە لە هەفتەی ڕابردووەوە دەستی پێکرد، هەردوولا هەڕەشەی پیشاندانی هێزی وڵاتەکانیان دەکەن، میدڤێدیڤ ئاگادارکردنەوەکەی ترەمپی بە هەڕەشەیەکی مەترسیدار و هەنگاوێک بەرەو جەنگی جیهانی ناوبرد.