لە ئەمساڵدا دۆسیەی بریکارەکانی خۆراک بە ئەلیکترۆنی دەکرێت

ئاڤا نیوز

دوای ئەوەی فۆڕمی خۆراکی هاونیشتمانیان بە ئەلیکترۆنی کرا،  پرۆسەی بە ئەلیکترۆنیکردنی دۆسیەی بریکارەکانی خۆراک لەسەر ئاستی عێراق دەستیپێکردووە، بڕیارە لە ئایندەیەکی نزیکدا هەمووی تەواو بکرێت.

وێنە گەورەکە: ماوەی چەند ساڵێکە پرۆسەی بە ئەلیکترۆنیکردنی کەرتە جیاوازەکان لەسەر ئاستی عێراق دەستیپێکردووە. بە ئەلیکترۆنیکردنی کاروبارەکانی وەزارەتی بازرگانی و دابەشکردنی خۆراک بەشێک بووە لەو پرۆسەیە.

لێدوانی فەرمی: سیامەند قادر، بەڕێوەبەری ڕێکخستنی پسوولەی خۆراک لە هەولێر بە ئاڤا میدیای وت، ماوەی چەند مانگێکە بەغدا داوای زانیاری دۆسیەی بریکارەکانی کردووە بە شێوازی ئەلیکترۆنی، بەشێکی زۆری کارەکان کۆتایی هاتووە، بەڵام لەبەر بە ئەلیکترۆنیکردنی پسوولەی خۆراک ئەم پرۆسەیەش ڕاگیرا. بەمزووانە دەستپێدەکەینەوە، تا ئێستا 60%ـی کارەکان کۆتایی هاتووە، ئەوەی تر تەنیا 15 ڕۆژی پێویستە کۆتایی دێت.

بە وتەی سیامەند قادر، ئەو گۆڕانکاریانەی ڕوودەدەن ئەمانەن:

٠ هەموو بریکارێکی خۆراک یان ئارد، دۆسیەیەکی تایبەت بەخۆی هەیە، لەو ڕۆژەی بریکاری وەرگرتووە تا ئێستا هەموو زانیارییەکی تێدایە، هاوشێوەی دۆسیەی فەرمانبەر لە فەرمانگەکان، ئەم دۆسیەیە بە ئەلیکترۆنی دەکرێت.

٠ ئەو کاتەی بڕیاردرا لیستەکانی مانگانە بنێردرێن بۆ بەغدا بە ئەلیکترۆنی دەنێردرێت.

٠ بریکارەکانی خۆراک و ئارد گرووپییان لە یەکێک لە ئەپەکان بۆ دادەنرێت، بەردەوام پەیوەندییان لەگەڵ بەغدا و وەزارەتی بازرگانی هەرێمی کوردستان دەبێت.

٠ ئێستا زیاتر لە 95%ـی بریکارەکانی خۆراک مانگانە بە (کریدت کارد) پارەی بەشە خۆراک دەدەن، ئەو کاتە هەموو مانگێک دەبێ بریکارەکان بە ئەلیکترۆنی پارە بۆ بەڕێوەبەرایەتی پسولەی خۆراک بنێرن و ئێمەش بۆ بانکی دەنێرین.

ئەوەی پێویستە بیزانیت: لەسەر ئاستی پارێزگای هەولێر سێ هەزار و 276 بریکاری ئارد و خۆراک هەن. ئەمساڵ دۆسیەی هەموویان دەکرێتە ئەلیکترۆنی.