مەشهەدانی شەش بەڵێن بە کوردانی ئێزدی و خەڵکی شنگال دەدات

ئاڤا نیوز

سەرۆکی پەرلەمانی عێراق دەڵێت، بۆ ساڕێژبوونی برینی ئێزدییەکان، پێویستە دادپەروەریی بۆیان بەدیبهێنرێت و بودجەیەکی تایبەتیش بۆ ئاوەدانکردنەوەی شنگال تەرخان بکرێت.

چیرۆکی سەرەکی: 3ـی ئابی ساڵی 2014 قەزای شنگال لەلایەن داعشەوە داگیرکرا و کۆمەڵکوژییەکی فراوان دژی بە خەڵکەکەی ئەنجامدا، زیاتر لە شەش هەزار ئێزدیش کە زۆرینەیان ژن و منداڵ بوون ڕفێنران تائێستاش چارەنوسی بەشێکیان نادیارە، لە 13ی تشرینی دووەمی 2015ش هێزی پێشمەرگە شنگالی کۆنتڕۆڵکردەوە.

لێدوانی فەرمی: مەحموود مەشهەدانی، سەرۆکی پەرلەمانی عێراق لە ڕاگەیێنراوێکدا ئاماژەی بەوەداوە، لەم ڕۆژەدا جەخت لە بەدیهێنانی دادپەروەریی بۆ قوربانییەکان و گەرەنتی بۆ دووبارەنەبوونەوەی ئەو تاوانە دەکەنەوە و داوای داننان بەو کۆمەڵکوژییە و ئاوەدانکردنەوەی شنگالیش دەکەن، ئەویش بەمەبەستی گەڕانەوەی شکۆمەندانەی خەڵکەکەی بۆ شوێنەکانی خۆیان.

مەشهەدانی بەڵێنیش بە ئێزدییەکان دەدات پەرلەمان لەم شەش بوارەدا هەموو هەوڵێک بخاتەکار:

1- یاسای ڕزگاربووانی ئێزدی بەتەواویی و وەخۆی جێبەجێ بکرێت.

2- چارەنوسی بێسەروشوێنکراوان ئاشکرا بکرێت و گۆڕە بە کۆمەڵەکان هەڵبدرێنەوە.

3- بودجەی ڕوون و دیاریکراو بۆ ئاوەدانکردنەوەی شنگال و ناوچە زیانبەرکەوتووەکان تەرخان بکرێت.

4- یاسای نوێ پەیوەست بەم بابەتە دەربکرێت، لەوانەش یاسای تاوانی دژ بە مرۆڤایەتی.

5- ئەو نەهامتیی و کۆمەڵکوژییەی بەسەر ئێزدییەکان هات بخرێتەناو وانەکانی پەروەردە و مێژووەوە تا هۆشیاری نیشتیمانی بەهێز بکات.

6-لێپرسینەوە لەوانە بکرێت کە لەم بوارەدا کەمتەرخەم بوون و بە ئەرکی خۆیان هەڵنەستاون.