ڕێبەر ئەحمەد: پێویستە حکومەتی عێراق بگەڕێتەوە سەر ڕێگەی دەستوور

ئاڤا نیوز

 

ڕێبەر ئەحمەد، وەزیری ناوخۆی هەرێمی کوردستان دەڵێت، بڕینی مووچە کارەساتێکی گەورەیە و پێویستە حکومەتی فیدڕاڵ بگەڕێتەوە سەر ڕێگەی دەستوور.

 

لێدوانی فەرمی: ڕێبەر ئەحمەد، وەزیری ناوخۆی هەرێمی کوردستان لە شاری دهۆک بەشداری لە ڕێوڕەسمی یادکردنەوەی کارەساتی شنگال کرد، دواتر لە کۆنگرەیەکی ڕۆژنامەوانیدا ڕایگەیاند، بابەتی مووچە بووەتە چیرۆکێکی دورودرێژ و جێگەی داخە، مووچە مافێکی سەرەتایییە و ژیانی خەڵکی کوردستان پێوەی گرێدراوە، بەڵام لەلایەن حکومەتی فیدڕاڵەوە بەم شێوەیە مامەڵەی لەگەڵدا دەکرێت.

 

زانیاریی زیاتر: بە گوتەی ڕێبەر ئەحمەد، پێویستە "حکومەتی فیدڕاڵ بگەڕێنەوە بۆ دەستوور، یاسا و مافی خەڵک جێبەجێ بکات، کۆتایی بە سیاسەتی دژایەتیی خەڵک و هێرشەکانی سەر کوردستان بهێنرێت، بۆیە بڕینی بودجە و مووچە هیچی لەو کارەساتانە کەمتر نەبووە کە پێشتر بەسەر کوردستاندا هاتووە، کۆمەڵکوژی و گەمارۆدانی خەڵک کارەساتێکی گەورەیە، ئێمە داوا دەکەین حکومەتی فیدڕاڵ بگەڕێتەوە سەر ڕێگای دەستوور و بابەتی مووچە چارەسەر بکات، وەک حکومەتی هەرێمی کوردستان هیچمان لەسەر خۆمان نەهێشتووەتەوە.

 

ئەوەی پێویستە بیزانیت: "هەرێمی کوردستان تەواوی پابەندییەکانی خۆی جێبەجێ کردووە، ئەو ڕێککەوتنانەی لە نێوان هەولێر و بەغدا کراوە، هەندێک بابەتی تێدایە لە دەرەوەی یاسا و دەستوورن، تاوەکو مووچەش دابین بکرێت، سەرۆکوەزیران بارزانی و ئەنجوومەنی وەزیران داواکارییەکانی بەغدایان پەسەند کردووە، ئیتر هەموو شتێک لەلای حکومەتی فیدڕاڵە و با چیتر بیانوو نەدۆزنەوە و مووچە خەرج بکەن". وەزیری ناوخۆی هەرێمی کوردستان وا دەڵێت.