ئەمریکا سزای دارایی بەسەر کۆمپانیای تێسلا دەسەپێنێت

ئاڤا نیوز

بەهۆی ڕووداوێکی هاتووچۆوە لە ساڵی 2019، ئەمریکا سزای دارایی بە بڕی 243 ملیۆن دۆلار بەسەر کۆمپانیای تێسلادا سەپاند. 

چیرۆکی سەرەکی: کۆمپانیای تێسلا یەکێکە لەو براندە جیهانییانەی کە کار لە دروستکردنی ئۆتۆمبێلی کارەبایی دەکات، ساڵی 2019 هاووڵاتییەکی ئەمریکی بەهۆی جۆرە ئۆتۆمبێلێکی ئەو کۆمپانیایە تووشی ڕووداوی هاتووچۆ دەبێت، کە دواتر بەهۆی سەختی برینەکەیەوە گیان لەدەست دەدات.

بڵاوکراوەی فەرمی: میدیا ئەمریکییەکان بڵاویان کردەوە، کۆمپانیاکە لەسەر ئەو دۆسییەی لەسەری کراوەتەوە نەیتوانیوە بەرگریی لەخۆی بکات بەهۆیەوە بە پێبژاردنی دارایی سزا دەدرێت. 

زانیاریی زیاتر: ئۆتۆمبێلێکی تێسلای مۆدێل ئێس ساڵی 2019، کە بەشێوەیەکی خودکار کاری کردووە و لە دۆخی "Autopilot" دا بووە کاتێک خۆی بە کەسێکدا کێشاوە و ئەمەش بووەتە هۆی گیان لەدەستدانی ئەو کەسە. 

لەلایەکی دیکەوە: کۆمپانیای تێسلا لەوبارەیەوە دەڵێت بۆ ئەوەی کۆمپانیاکەمان لەلایەن بەکارهێنەرانمانەوە نەچێتە ژێرباری پرسیارەوە، پێداچوونەوە بەو سزایە دەکەین.