هاتووچۆی هەولێر لەبارەی سزادانی ئۆتۆمبێلی ژمارە عێراقی و بیانی ڕوونکردنەوە دەدات

ئاڤا نیوز

بەڕێوەبەرایەتیی هاتووچۆی هەولێر لەبارەی چۆنییەتی مامەڵەکردن لەگەڵ ئەو ئۆتۆمبێلانەی، کە هەڵگری تابلۆی ناوخۆ و دەرەوەی عێراقن ڕایگەیاند 'لێپێچینەوەیان لەگەڵ دەکەین'.

وێنە گەورەکە: پێشتر تێگەیشتنێکی هەڵە هەبوو بەرامبەر سزادانی ئەو ئۆتۆمبێلانەی خاوەن ژمارەی بیانی یاخود عێراقی بوون، هاووڵاتییان پێیان وابوو کە لەکاتی سەرپێچیدا بە پێبژارد سزا نادرێن. 

لێدوانی فەرمی: عەقید هێمن ئەمین، وتەبێژی بەڕێوەبەرایەتی هاتووچۆی هەرێمی کوردستان بە ئاڤا میدیای ڕاگەیاند: هەر ئۆتۆمبێلێک هەڵگری تابلۆی شارەکانی ناوەڕاست و خوارووی عێراق بێت و لە هەرێمی کوردستان سەرپێچی بکات، سزا دەدرێن و پێبژاردنی هاتووچۆیان لەگەڵ دەکرێت.

وتەبێژەکەی بەڕێوەبەرایەتیی هاتووچۆی هەولێر وتیشی: هەر ئۆتۆمبێلێکی هەڵگری تابلۆی هەرێمی کوردستان بچێتە پارێزگاکانی عێراق و سەرپێچی هاتووچۆ بکات، لە سیستمی هاتووچۆی هەرێم تۆمار دەکرێت و دەبێت پارەکەی بدات.

لەلایەکی دیکەوە: عەقید هێمن ئەمین ئاماژەی بەوە کرد، ئەو ئۆتۆمبێلانەی هەڵگری تابلۆی دەرەوەی عێراقبن و سەرپێچی هاتووچۆیان کردبێت، لە کاتی گەڕانەوەیان لە خاڵە سنوورییەکانی هەرێمی کوردستان، سزا دەدرێن و پارەکەیان لێ وەردەگیرێتەوە.

ئەوەی پێویستە بیزانیت: هۆبەی تایبەت بە ئەستۆپاکی هاتووچۆ لە بەڕێوەبەرایەتیی هاتووچۆی هەولێر هەیە، بۆیە هەر ئۆتۆمبێلێکی هەڵگری تابلۆی شارەکانی ناوەڕاست و خوارووی عێراق و دەرەوەی وڵات بێت، پێویستە پێش ڕۆشتنەوەیان ئەستۆپاکی بکەن.