پیردەیان جەعفەر: لە شنگال لەڕێگەی تونێلەوە بازرگانی بە چەک و ماددەی هۆشبەر دەکرێت

ئاڤا نیوز

بەڕێوەبەری كۆچ و كۆچبەرانی دھۆک ڕایدەگەیێنێت، لەڕێگەی تونێلەوە لە چیای شنگال بۆ وڵاتانی دراوسێ بازرگانی بە چەک و ماددەی هۆشبەر دەکرێت. هەندێک لە تونێلەکان ئۆتۆمبێل و بارهەڵگری پێدا هاتووچۆ دەکات.

چیرۆکی سەرەکی: سێی ئابی 2014 داعش هێرشی کردە سەر شنگال و کۆمەڵکوژی و کاولکاری زۆری بەسەر ئەو سنوورە هێنا، دوای 11 ساڵ لەو تاوانە، هێشتا بارودۆخی شنگال و دەوروبەری ناسەقامگیرە، بەهۆیەوە ئاوارەکانی شنگال ناتوانن بگەڕێنەوە زێدی خۆیان.

لێدوانی فەرمی: پیردەیان جەعفەر، بەڕێوەبەری كۆچ و كۆچبەرانی دھۆک بە ئاڤای گوت، لە چیای شنگال هەندێ تونێل هەڵکەنراون تێیدا هاتووچۆی وڵاتانی دراوسێ دەکرێت، لەڕێگەی ئەو تونێلانەوە بازرگانی بە چەک و ماددەی هۆشبەر دەکرێت، بەشێکی ئەو تونێلانە دەتوانرێت ئۆتۆمبێل و بارهەڵگر بەناویدا هاتووچۆ بکات.

- میلیشیاکان لە شنگال خۆیان سەپاندووە و ناهێڵن دۆخی ئەو سنوورە ئاسایی ببێتەوە و ڕێککەوتنی شنگالیش جێبەجێ بکرێت.

- حکومەتی عێراق بانگەشەی ئەوە دەکات کە دیواری کۆنکریتی لە سەر سنوور دروست دەکات، ئەو دیوارە هیچ کاریگەری نابێت، چونکە هاتووچۆی ئەو گرووپانە زیاتر لەڕێگەی ئەو تونێلانە دەکرێت.

ئەوەی پێویستە بیزانیت: بەهۆی خراپی دۆخی شنگال لەڕووی ئەمنی و خزمەتگوزاری و ئابوورییەوە نزیکەی 280 هەزار ئاوارەی ئێزدی لە هەرێمی کوردستانن و ناتوانن بگەڕێنەوە شنگال، زیاتر لە چوار هەزار ئاوارەی ئێزدیش کە گەڕابوونەوە زێدی خۆیان جارێکی دیکە شنگالیان جێهێشتووە و ئاوارە بوونەتەوە.

باکگراوند: بە ئامانجی ئاسایی کردنەوەی بارودۆخی شنگال و ئاوەدانکردنەوەی سنوورەکە و گەڕانەوەی ئاوارەکان و قەرەبوو کردنەوەیان، ڕۆژی نۆی ئۆکتۆبەری ساڵی 2020، ڕێككەوتنی شنگال لە نێوان حكومەتی عێراق و حكومەتی هەرێمی كوردستان واژۆ کرا، بەڵام تاوەکو ئێستا حکومەتی عێراقی ڕێککەوتنەکە جێبەجێ نەکردووە و هەنگاوی جدی و ئامادەکاری پێویستی نەکردووە بۆ جێبەجێکردنی ئەو ڕێککەوتنە.