کارەبای 24 کاتژمێری دەگاتە قەزای خەبات

ئاڤا نیوز

بڕیارە لە مانگی 10ـی ئەمساڵ پرۆژەی ڕووناکی بگاتە قەزای خەبات لە پارێزگای هەولێر، بەتەواوبوونی پرۆژەکە کێشەی کارەبا لە قەزاکە و دەوروبەری چارەسەر دەبێت.

وێنە گەورەکە: لەسەر ڕاسپاردەی سەرۆکوەزیران مەسرور بارزانی، پرۆژەی ڕووناکی لەهەرێمی کوردستان دەستیپێکرد، بڕیارە تا کۆتایی 2025 لە سەرجەم سەنتەری شارەکان پرۆژەکە جێبەجێبکرێت، تاکۆتایی  ساڵی 2026 لە هەموو هەرێمی کوردستان جێبەجێبکرێت و هەموو ماڵێک ببێتە خاوەنی کارەبای 24 کاتژمێری، هاوکات بڕیارە دوو مانگی دیکە پرۆژەکە بگاتە قەزای خەبات و دەوروبەری.

لێدوانی فەرمی: کوێستان ئەحمەد، قایمقامی قەزای خەبات، بە ئاڤا میدیای ڕاگەیاند، بڕیارە لە مانگی 10ـی ئەمساڵ پرۆژەی ڕووناکی بگاتە قەزای خەبات، بەتەواو بوونی پرۆژەکە کێشەی کارەبا لە قەزای خەبات و دەوروبەری چارەسەر دەبێت.

لەلایەکی دیکەوە: عەزیز ئەحمەد، جێگری بەڕێوەبەری نووسینگەی سەرۆكی حكومەتی هەرێمی كوردستان ڕایگەیاندووە، لەسەر ڕاسپاردەی سەرۆکوەزیران مەسرور بارزانی قەزای خەبات و بەحركە و گوندەكانی دەورووبەری هەولێر دێنە ناو پڕۆژەی ڕووناكییەوە، لەسەرەتا مانگی نۆی ئەمساڵ پچڕانی کارەبا لە گوندەکانی دەرەوەی شەقامی بازنەیی 150 مەتری نامێنێت.

ئەوەی پێویستە بیزانیت: بەپێی پلانی پڕۆژەی ڕووناکی، تاکۆتایی ساڵی 2026 تەواوی هەرێمی کوردستان کارەبای دەبێتە 24 کاتژمێری و بەیەکجاری مۆلیدەی گەڕەکەکان دەکوژێنرێنەوە.