20 ساڵەی دامەزراندن؛ دەزگای خێرخوازیی بارزانی بەردەوامە

ئاڤا نیوز

ئەمڕۆ 20 ساڵ بەسەر دامەزراندنی دەزگای خێرخوازیی بارزانی تێدەپەڕێت، لەو ماوەیەدا چەندین پرۆژە و کاری خێرخوازی لە ناوخۆی هەرێمی کوردستان و عێراق و دەرەوەش ئەنجامداوە.

وێنە گەورەکە: لە ساڵی 2005 لە شاری هەولێر، دەزگای خێرخوازیی بارزانی لەژێر دروشمی 'شانازییە بۆ مرۆڤ خزمەتی میللەتی خۆی بکات' دامەزراوە، لەلایەن مەسرور بارزانییەوە بیرۆکەی دانراوە و هەر خۆی سەرۆکی بۆردی دامەزرێنەرانە، ئەم دەزگایە چەندین کاری خێرخوازی بە مرۆڤایەتی کردووە، هەروەها لە کارەساتە سرووشتی و مرۆییەکاندا بەبێ گوێدان بە سنوورەکان هاوکاری بە هەموو شوێنەکان گەیاندووە.

زانیاریی بەدەستهاتوو: دەزگای خێرخوازیی بارزانی 10 سێکتەر لە خۆی دەگرێت کە بریتیین لە؛ پەروەردە و پەرەپێدان، تەندروستی، پاراستنی جەستەیی، پەناگە، کەلوپەلی ناخۆراکی، ژیانەوانی، ئاسایشی خۆراک، ئاو و ئاوەڕۆ، بەڕێوەبردن و هەماهەنگی کەمپەکان.

زانیاریی زیاتر: ماوەی 12 ساڵە پڕۆژەی ئازیزانی داناوە، کە خۆی لە هاوکاریکردن و یارمەتیدانی 17 هەزار ژنی بێهاوژین و منداڵ دەگرێتەوە.

ئەوەی پێویستە بیزانیت: دەزگای خێرخوازیی بارزانی دوو سەنتەری ئۆتیزمی لە هەولێر و دهۆک کردووەتەوە، ئێستا دروستکردنی سەنتەرێکی ئۆتیزم لە زاخۆ لە قۆناغی تەواوبووندایە، بەرنامەشی بۆ دروستکردنی سەنتەرێکی دیکەی لە دهۆک هەیە. خاوەنی هەشت نووسینگە و نوێنەرایەتییە لە هەولێر، سلێمانی، هەڵەبجە، کەرکووک، شنگال، نەینەوا. ئەمریکا، بەریتانیا.

لەلایەکی دیکەوە: بەهۆی کارەکانییەوە، لەلایەن کۆمەڵگە و ڕێکخراوە نێودەوڵەتییەکان متمانەی پێبەخشراوە، وەک ئەندام لە ئەنجوومەنی ئابووریی و کۆمەڵایەتی نەتەوە یەکگرتووەکان ' ECOSOC ' دانراوە.