کۆنفرانسی یەکڕیزیی پێکهاتەکانی باکوور و ڕۆژهەڵاتی سووریا بەڕێوەدەچێت

ئاڤا نیوز

هاوشێوەی ئەو کۆنفرانسەی تایبەت بە یەکهەڵوێستی کورد مانگی نیسانی ئەمساڵ بەڕێوەچوو، ڕۆژئاوای کوردستان خۆی بۆ سازکردنی کۆنفرانسێکی دیکە ساز دەکات کە ئەمجارە فراوانتر دەبێت و سەرجەم پێکهاتەکانی باکوور و ڕۆژهەڵاتی سووریا بەشداریی تێدا دەکەن.

وێنە گەورەکە: کۆنفڕانسی یەکڕیزیی هەڵوێستی کورد ڕۆژی 26-4-2025 لە شاری قامیشلۆی ڕۆژئاوای کوردستان بە بەشداری لایەنە سیاسیی و کەسایەتییە کوردییەکان، بەڕێوەچوو، لە کۆنفرانسەکەدا بڕیار درا بۆ گفتوگۆ لەسەر مافە دەستوورییەکانی کورد و سیستمی لامەرکەزی بۆ ڕۆژئاوای کوردستان، شاندێکی هاوبەش و یەکگرتووی کورد سەردانی دیمەشق بکات.

لێدوانی فەرمی: جوان مەلا ئیبراهیم، هاوسەرۆکی فەرمانگەی ڕاگەیاندن لە ئیدارەی خۆسەری و ئەندامی لیژنەی ئامادەکاری کۆنفرانسی "یەکڕیزیی و یەکهەڵوێستی پێکهاتەکانی باکوور و ڕۆژهەڵاتی سووریا" بە میدیاکانی ڕۆژئاوای کوردستانی ڕاگەیاند، لە مانگی حوزەیرانەوە ئامادەکارییەکانیان بۆ کۆنفرانس بەردەوامە و لە کۆنفرانسەکەدا جەخت لە یەکهەڵوێستی پێکهاتەکان بۆ سووریایەکی ناناوەندی و دیموکراسیی دەکرێتەوە.

ئاماژەی بەوەشکرد، چاوەڕێ دەکرێت 400 تا 500 نوێنەری پێکهاتەکانی باکوور و ڕۆژهەڵاتی سووریا لە کورد، عەرەب،  سریان، ئاشووریی، ئەرمەن، ئێزدی، تورکمان و شرکەس لە کۆنفرانسەکەدا بەشداری بکەن کە کەسایەتی کۆمەڵایەتی، ڕۆشنبیریی، ئاینیی و ڕۆحی لەخۆدەگرێت، بڕیاریشە لە ماوەیەکی نزیکدا کات و شوێنی بەڕێوەچوونی کۆنفرانسەکە ڕابگەیێنرێت.

بەوتەی جوان مەلا ئیبراهیم، کۆنفرانسەکە لە ژێر ناونیشانی "پێکەوە بۆ هەمەڕەنگی کە یەکڕیزیمان پتەو دەکات، هاوبەشی داهاتوومان بنیاد دەنێت"، بەڕێوەدەچێت.