بکوژی سێ کەسەکەی هەولێر لەلایەن پۆلیس دەستگیر کرا

ئاڤا نیوز

 

پۆلیسی هەولێر لەسەر ڕووداوی کوشتنەکەی بەنزینخانەیەكی هەولێر ڕوونكردنەوە دەدات و دەڵێت، تۆمەتبار دەستگیركراوە و پەڕاوی لێكۆڵینەوەش لەسەر ڕووداوەكە كراوەتەوە.

 

چیرۆكی سەرەكی: شەوی چوارشەممە كاتژمێر 8:30ـی خولەكی ڕۆژی 6ـی ئابی 2025، لە بەنزیخانەیەکی سەر شەقامی کۆیە لە شاری هەولێر، کارمەندی بەنزینخانەکە و شۆفێرێک و سەرنشینی ئۆتۆمبێلەکە دەبێتە دەمەقاڵێیان، لەلایەن کارمەندی بەنزینخانەکەوە تەقە دەکرێت و لە ئەنجامدا سێ هاووڵاتی دەکوژرێن.

 

ڕاگەیێنراوی فەرمی: بەڕێوەبەرایەتیی پۆلیسی پارێزگای هەولێر لە ڕاگەیێنراوێكدا ئاماژەی بەوە كردووە، دەستبەجێ تیمەکانمان لە بەڕێوەبەرایەتیی پۆلیس تۆمەتباریان دەستگیرکرد و لە ئێستاشدا بە بڕیاری دادوەری لێكۆڵینەوە ڕاگیراوە و لێکۆڵینەوەش لە ڕووداوەکە بەردەوامە.

 

زانیاریی پەیامنێر: هیشام سەعید، پەیامنێری ئاڤا لە شوێنی ڕووداوەكە ڕایگەیاند، كارمەندە تۆمەتبارەكەی بەنزینخانەكە، تەمەنی 25 ساڵە و بە چەكی كلاشینكۆفی نێو بەنزینخانەكە ڕووداوەكەی ئەنجامداوە، تەرمی كوژراوانیش ڕەوانەی پزیشكی دادی كراون بۆ ئەنجامدانی ڕێكاری توێكاری جەستەیی و گەیشتن بە وردەكاری ڕووداوە تاوانكارییەكە.