بکوژی دوو کەسەکەی سێشەممەی ڕابردووی هەڵەبجە خۆی ڕادەستی پۆلیس کرد

ئاڤا نیوز

دوای دوو ڕۆژ لە ڕووداوەکە، پۆلیسی پارێزگای هەڵەبجە، دەستگیرکردنی تۆمەتباری کوشتنی دووگەنجەکەی گەڕەکی فەرمانبەرانی هەڵەبجەی ڕاگەیاند و بە گوتەی پۆلیس، تۆمەتبار خۆی ڕادەست کردووە.

چیرۆکی سەرەکی: نزیکەی کاتژمێر 03:00 بەرەبەیانی سێشەممە، لەبەردەم ماڵێک لەگەڕەکی فەرمانبەرانی شاری هەڵەبجە کەسێک تەقە لە سێ گەنج دەکات و ڕادەکات، دووانیان کوژران و یەکێکیان بریندارە.

ڕاگەێینراوی فەرمی: بەگوێرەی ڕاگەیێنراوی پۆلیسی پارێزگای هەڵەبجە، پاش هەڵگرتنەوەی کامێرای چاودێری شوێنی ڕووداوەکە و وەرگرتنی وتەی شاهێدی ڕووداوەکە، توانراوە تۆمەتباری ڕووداوەکە دیاری بکرێت، تۆمەتبار (ش . ف .ع) لە دایکبووی 2003 دانیشتووی پارێزگای هەڵەبجە خۆی ڕادەستی هێزەکانی پۆلیس کردووە.

زانیاریی زیاتر: تۆمەتبار لەبەردەم دادوەری لێکۆڵینەوە دانی بەتاوانەکەیدا ناوە، بەگوێرەی یاسای ژمارە 406 لە یاسای سزادانی عێراق ڕاگیراوە و لێکۆڵینەوە لە ڕووداوەکە بەردەوامە.