ورده‌كاریی كێشه‌كه‌ی پارتی سۆسیال دیموكرات لە خانەقین

ئاڤا نیوز

ناکۆکییە ناوخۆییەکانی پارتی سۆسیالیست دیموکراتی کوردستان گەیشتنە خانەقین، ئەمەش دوای ئەوەی بەرپرسێکی باڵای حیزبەکە دەستی لەکارکێشایەوە و ڕایگەیاند کە هێزێکی سەر بە حیزبەکەی خۆی هەڵیکوتاوەتە سەری و تەقەیان لێکردووە.

لێدوانی فەرمی: حوسێن جەلیل سەعید، ئەندامی سەرکردایەتی و بەرپرسی پێشووی مەڵبەندی خانەقینی پارتی سۆسیالیست بە ئاڤای ڕاگەیاند "من ئیستیقالەم داوە و باوەڕم بە کاری حیزبایەتی نەماوە، بەڵام سۆسیالیست لە شارەزوورەوە (مەبەست لێی گوڵەخانە) هێزێکی ئەمنیی ناردووەتە سەرم."

حوسێن جەلیل جەختی لەوەش کردەوە کە ئەو هێزە تەقەیان لێکردووە و مەبەستیانە دەست بەسەر زەوی و ماڵ و ئەو بارەگایەدا بگرن کە ئەوانی تێدایە. ئەو دەڵێت: "من ئەم بارەگایە چۆڵ ناکەم، چونکە ئێرە زەوی و ماڵی منە و لەسەر موڵکی خۆم دروستم کردووە. کەی یاسا بڕیاری دا، بە چاوان چۆڵی دەکەم."

گوتیشی، ناحەقیی بەرامبەر کراوە و سوورە لەسەر هەڵوێستی خۆی و وتی: "بمکوژن و بمبڕن من نابمەوە بە سۆسیال."

ئەوەی پێویستە بیزانیت: کێشەکە تەنها بە حوسێن جەلیلەوە نەوەستاوە. بەپێی زانیارییەکانی ئاڤا، ژمارەیەک کادری دیکەی حیزبەکەش لەگەڵیدا دەستیان لەکارکێشاوەتەوە، ئەمەش بووەتە هۆی ئەوەی حیزبی سۆسیالیست لە خانەقین بە کردەوە ببێتە دوو بەش و دوو بارەگایان هەبێت. یەکێکیان لەلایەن ئەو هێزەوە کۆنترۆڵ کراوە کە لەلایەن پارتی سۆسیالیست دیموکراتی کوردستانەوە نێردراوە. بارەگاکەی دیکەش لەژێر دەستی حوسێن جەلیل و لایەنگرانیەتی و ئامادەنین ڕادەستی بکەن.

 

هۆکارە زانراوەکان: زانیارییەکان باس لەوە دەکەن حوسێن جەلیل و هاوڕێکانی چوونەتە بەرەی عەبدوڵڵای حاجی مەحموود، کە برا و ڕکابەری محەممەد حاجی مەحموودی کەسی یەکەمی پارتی سۆسیالیست دیموکراتی کوردستانە. بەڵام خودی حوسێن جەلیل ئەمە ڕەتدەکاتەوە و جەخت دەکاتەوە کە "چیتر کەسێکی حیزبی نییە و سەر بە هیچ کەس و لایەنێک نییە."