فایلی خەڵک؛ لە سلێمانی مامۆستایانی ئایینیی خۆبەخش داوای دامەزراندن دەکەن

ئاڤا نیوز

ژمارەیەک مامۆستایانی ئایینیی خۆبەخش لە سلێمانی داوای دامەزراندن دەکەن. هەریەک لەو مامۆستایانە مانگانە 250 هەزار دیناریان وەک مینحە پێدەدرێت.

زانیاریی پەیامنێر: ژمارەیەک مامۆستای ئاینی خۆبەخش لە سلێمانی دەڵێ، "بە نوێنەرایەتیی سێ هەزار مامۆستای ئاینی خۆبەخش داوای دامەزراندن دەکەین". دەشڵین، مامۆستای ئایینیمان هەیە کە ساڵە بە خۆبەخشی وەک وتاربێژ و پێشنوێژ خزمەت دەکات، کەچی نە بە گرێبەست و نە بە هەمیشەیی کەسیان دانەمەزراون.

ئەو مامۆستایانە دەڵێن، "دوو ساڵە چەندین کۆبوونەوەمان لەگەڵ وەزارەتی ئەوقاف کردووە، بەڵام هێشتا هەوڵەکانمان هیچ ئەنجامێکی نەبووە".

ئاماژە بەوەش دەکەن، لە مانگی نۆی ساڵی پارەوە وەزارەتی ئەوقاف 375 ملیۆن دیناری تەرخانکردووە وەکو مینحە دەیدا بە هەزار و 500 مامۆستای ئاینی کە هەریەک لەو مامۆستایانە 250 هەزاردیناریان پێ دەدرێت، بەڵام ئەوەی مامۆستایان داوای دەکەن دامەزراندنیانە بە گرێبەست نەک بڕینەوەی مینحە.

ئەو مامۆستا ئاینیینە دەڵێن، "سوپاسی حکومەت دەکەین نیوەی کارەکەی بۆ کردووین، بەڵام داوا دەکەین نیوەکەی تریشمان بۆ تەواو بکەن و بمانکەن بە گرێبەست".

لێدوانی فەرمی: لەبارەی داواکاری ئەم مامۆستا ئاینییان، نەبەز ئیسماعیل، وتەبێژی وەزارەتی ئەوقافی هەرێمی کوردستان بە ئاڤا میدیای وت، "بە دڵنیاییەوە کاری جدیمان کردووە، لەگەڵ پێکهێنانی کابینەی نوێ و پەسەندکردنی بودجە، هەوڵمان داوە  مافیان بپارێزرێت و هەموو شتێک بە دڵی ئەوان دەبێت".